Reportajen Filomena da Conceição
Sekretáriu Estadu Arte no Kultura (SEAK), Jorge Soares Cristovão, ohin hala’o vizita kortejia ba Asosiasaun Arte Moris hodi rona sira nia difikuldade ne’ebé sira hasoru durante ne’e, atu nune’e bele tau atensaun no promove sira nia talentu hodi reprezenta nasaun iha eventu internasional sira.
Sekretáriu Estadu Arte no Kultura (SEAK), Jorge Soares Cristovão, hateten, iha tinan kotuk, espasu ne’ebé durante Arte Moris utiliza ba nia atividade, governu entrega tiha ba asosiasaun veteranus, no iha momentu ne’ebá entrega tiha fatin Arte Moris ne’e ba veteranus no Arte Moris rasik laiha tiha fatin hodi hala’o sira nia atividade. Maibé Prezidente Republika José Ramo-Horta entrega fatin iha Palásiu Prezidente ne’e ba sira hodi uza provizoriu atu halo atividade, hodi nune’e sira-nia talentu ne’ebé sira iha keta lakon.
“Objetivo Vizita kortejia ba Arte Moris ne’e atu rona sira nia preokupasaun ne’ebé sira hasoru,” dehan Sekretáriu Estadu Arte no Kultura, Jorge Soares Cristovão ba Jornalista sira, iha Arte Moris, Palásiu prezidensiál, kinta, 13/07.
Nia esplika, difikuldade ne’ebé arte moris hasoru ne’e, iha programa nonu governu nian, tau mós prioridade ba arte i kultura tanba, iha lei sita mós katak governu sei tau atensaun ba asosiasaun arte no kultura nian, tanba ne’e, arte moris mós hanesan asosiasaun ida ba governu atu fasilita, sira nia atividade hanesan, pintura, teatru, no dansa kultura ida ne’e mak polítiku ida ba oin governu sei tau atensaun hodi bele promove liu tan sira-nia talentu ne’ebé iha hodi reprezenta nasaun iha eventu internasional sira.
Tanba ne’e, programa Nonu Governu sei kontinua tau atensaun mós asosiasaun sira no promove joventude sira, no kontinua promove hodi proteje kultura ne’ebé mak durante ne’e iha, no iha programa 120 dias SEAK sei halo lansamentu ba kultura, no programa expozisaun ba arte no tais
Iha fatin hanesan, Presidente Asosiasaun Arte Moris, Iliwatu Danapare, hateten, durante muda husi Comoro mai iha palásiu preokupasaun ne’ebé Arte Moris hasoru mak fundus tanba liuhusi fundus mak ajuda sira hola sosa ekipamentus sira ba pintura nian.
“Momentu sai husi ne’eba ami nia preokupasaun mak espasu tanba liuhusi espasu mak ami bele halibur malu ho diak ho inspira malu atu hala’o ami nia atividade lorloron nian, no ami hetan tiha espasu agora preokupasaun bo’ot ne’ebé ami hasoru mak fundus, tanba fundus laiha, susar mai ami atu hala’o ami nia atividade” espresa Iliwatu.
Tanba uluk Arte Moris harii ho ema na’in 10 maibé, dadaun ne’e ema barak no obra ne’ebé sira halo ema husi rai li’ur mós sosa, hanesan Indonesia, Austrália, Italia no Brazil no Arte Moris dadaun ne’e kontinua loke formasaun ba joven sira hodi promove sira nia talentu, nune’e, asosiasaun Arte Moris mós iha banda sira hanesan, bibi bulak, galxy no teatru.
Entretantu, iha Vizita ne’e Sekretáriu Estadu Arte no Kultura promete, iha programa governo, sei tau prioridade ba preokupasaun ne’ebé Asosiasaun Arte Moris hasoru no promete sei kordena ho parte tekniku hodi kria fali espasu ne’ebé di’ak no apoiu orsamentu ba sira, hodi tau hanesan sentru turístiku iha futuru.
