Reportajen David da Costa
Iha hasoru malu ho Presidente Ramos Horta, governantes ho digninatriu sira seluk iha Palasiu Presidente, horiseik (9/09) Sua Santidade Papa Francisco husu atu labele haluha labarik no adolexente barak ne’ebé hetan violasaun ba sira-nia dignidade. Papa husu atu prevene abuzu hasoru labarik no adolesente sira.
“Ita labele haluha labarik no adolesente sira mak hetan violasaun ba sira nia dignidade. Fenomenu ida ne’e mosu iha mundo tomak. Ita hotu hetan bolu hodi halo asaun ho responsabilidade hodi prevene qualker tipu abuzu no garante kresimentu dame ita nia joven sira nian”, Papa Francisco hato’o.
Loron tolu liuba, Organizasaun Naun-Governamental nia salurik (FONGTIL) mos hato’o karta aberta ba Papa Francisco no karta ne’e husu atu Papa Francisco atu foti medida hodi preven abuzu sexual mak halo ho lider igreja nian sira no mos lider nasaun nian.
“Abuzu sexual ne’e violasaun seriu ba ema nia dignidade no fo impaktu ba feto no mos ba mane, liliu ba labarik sira. Vitima sira sofre mentalmente no psikolojikamente, no dala barak hetan depresaun tempu naruk, ho fo efeitu ba produtividade ema nian”, Direitur FONGTIL, Valentim da Costa Pinto hateten.
Tinan liman ikus ne’e Igreja Katolik Timor-Leste nian hasoru tiha ona problema oioin relasiona ho abuzu sexual mak halo hosi padre sira. Iha Oecusse-Ambeno, Padre America ida, Richard Dascbach halo violasaun sexual hasoru labarik sira no hetan tiha ona kastigu tinan 12 iha komarka. Tinan hirak liuba Bispo Belo mos hetan tiha ona sansaun restrisaun disiplinaria no bandu atu kontaktu ho labarik sira.
Iha tempu hanesan Papa Francisco mos husu atu ema hotu atu kontinua ho konfiansa foun no matenek ba konstrusaun no konsolidasaun iha instituisaun sira, iha Repúblika ida ne’e, atu nune’e iha kapasidade tomak atu serví Povu Timor-Leste no sidadaun sira bele sente reprezentadu ho efetivu.
