Reportagem Filomena da Conceição
Uniaun Europeia (EU) hamutuk ho Plan internasional Timor-Leste (PITL) ho parseiru organizasaun sosiedade sivil (OSS) sira hanesan ADTL, Belun, JPIC no MOFFE lansa projetu foun hodi promove Eleisaun Demokrátiku no Inkluziva iha Timor-Leste.
Embaixadór Uniaun Europeia iha Timor-Leste, Marc Fiederich hateten Uniaun Europeia sei apoiu Timor-oan sira hodi hametin demokrasia iha prosesu eleitorál iha Timor-Leste.
“Ohin ami iha ne’e atu selebra lansamentu projetu foun husi União Europeia sei apoiu hametin demokrasia iha Timor-Leste liuhusi prosesu eleitoral. Entaun projetu ida ne’e rezultadu husi misaun UE tinan kotuk atu halo observasaun durante eleisaun prezidensial sempre iha relatório no rekomendasaun sira ba governu” dehan Marc ba jornalista sira iha Salaun Delta-Nova, 9/02.
Nia hatutan projetu ida ne’e sei foku atu asegura katak membru sosiedade Timor-oan hotu inklui partisipasaun feto iha prosesu eleitorál, no ema ho defisiénsia sira hetan asesu ne’ebé hanesan ba prosesu eleitorál. Ho núne’e projetu foun ne’e implementa husi Plan Internasional Timor-Leste (PITL) hamutuk ho parseiru organizasaun sosiedade sivil, sira hanesan ADTL, Belun, JPIC, MOFFE, patria no Caucus hodi promove partisipasaun inkluzivu husi Feto, Joven no ema hanesan difisiénsia iha prosesu eleisaun.
Nia esplika projetu ne’e sei implementa iha munisipiu 14 ho durasaun tinan rua, no objetivu husi projetu ne’e atu kria futuru ba lei no prosesu eleitoral armoniza, atu promove partisipasaun inkluzivu husi eleitores Timor-oan sira. Aleinde ne’e projetu refere mos sei servisu hamtuk ho Radiu komunidade hotu atu sustentável no asensivel hodi fahe eleitoral katak feto no joven sira iha kapasidade atu partisipa tomak iha prosesu politiku foti desizaun no promove asegura partisipasaun ema ho difisiensia iha prosesu eleitoral.
Entretantu UE iha kompromisu atu apoiu demokrasia direitu humanus iha Timor-Leste no fortaleza asaun sosiedade sivíl, hodi reforsa esforsu Governu no povu Timor nian atu harii demokrasia forte no sensível.
