Reportazen Zevonia Vieira
Sekretariu Estadu Juventude no Desportu hamutuk ho Ajensia Kooperasaun Internasional Korea (KOICA) asina akordu konaba projetu Kooperasaun Desportu ba Labarik sira nia Dezenvolvimentu iha Timor-Leste ho KOICA ho apoiu orsamentu total $6.500.000.
Liu hosi seremonia asina akordu, Sekretariu Estadu Juventude no Desportu (SEJD), Eng. Abrao Saldanha Nokosiku hateten seremonia ne’e fo marka ida tan ba relasaun bilateral ne’ebe amigavel no metin tebes, entre governu Korea ho Timor-Leste., fo sasin konaba relasaun diak entre povu rai rua, ne’ebe ita harii hahu kedas husi tempu povu Timor-Leste nia luta ba Ukun Rasik An.
Sekretariu Estadu hateten dokumentu ohin nee sei lori Sekretaría Estadu Juventude no Desportu ho KOICA, atu hahu prosesu sira ne’ebé nesesariu ba implementasaun projetu kooperasaun sobre desportu ba labarik sira nia dezenvolvimentu iha Timor-Leste. L
“Liu husi kooperasaun ida ne’e, ita nia povu amigu Repúblika Korea sei fo tulun mai ita atu harii sentru deportu Juvenil foun ida iha Dili, no rehabilita kampu futeból komunitariu tolu iha Dili laran. Nune’e mós fornese ekipamentus desportivu nesesariu sira ba facilidade desportivu hirak ne’e”, dehan Abrao Saldanha, iha kampu Demokrasia, 22/08.
Sekretariu Estadu hateten nudar assume kargu ida ne’e ho vizaun ida mak ‘Foin-Sa’e Millenial Forsa Kriativa ba dezenvolvimentu juventude no desportu iha sosiedade no prestasaun”. Atu hametin desportu iha ita nia sosiedade no kontribui ba hasa’e liu tan Timor-Leste nia prestasaun desportivu iha nivel rejional no internasional, “ha’u haksolok tan projetu ida ne’e sei kontribui ba vizaun polítika ida ne’e atu lori desportu ba komunidade no hametin desportu iha baze”.
Abrao rekonnese katak durante ne’e investimentu iha seitor desportu fo atensaun maka’as liu iha nivel kompetisaun deit, enkuantu investimentu iha nivel baze no masifikasaun sei fraku tebtebes. Ida ne’e akontese kuazu iha elementu hotu-hotu iha desportu, ligadu ba atletas, treinadores, árbitus, professores edukasaun fisika, animadores desportu, infraestruturas, ekipamentus no sistema kompetisoins ne’ebé seidauk estruturadu.
Abrao dehan investimentu ba prestasaun desportivu Timor-Leste nian so efetivu se ita halo balansu ho investimentu ba haboot no haforte desportu iha baze.
Ho intensaun ida ne’e duni mak vizaun Sekretariu Estadu nian ida ne’e mai atu ajuda ita fo atensaun ba haboot no haforte desportu iha baze. Ida ne’e sei ajuda ita atu hadiak liu tan ita nia prestasaun desportivu iha rai laran, iha nível rejional no mós internasional. Asistensia ne’ebé ita atu simu husi povu amigu Korea ne’e sei tulun ita hametin desportu iha baze no fasilita ita promove no hala’o kompetisaun desportiva sira iha ita nia rai laran.
Tuir dokumentu Record of Dicsussions ne’ebé asina ohin, objetivu espesífiku husi investimentu ida ne’e mak ita nia labarik, adolescentes ho joven sira. Ida ne’e importante tebtebes tan pur volta 75% husi ita nia populasaun ho idade menus husi tinan 35.
“Há’u hein katak ita nia joven sira, autoridade munisipal, postu administrativu no suku sira sei bele serbisu hamutuk atu utiliza fasilidade hirak ne’e ho diak. Sekretaría Estadu Juventude no Desportu komprometidu nafatin atu halo serbisu ne’ebé ami tenki halo atu ajuda no garante funsionamentu facilidade hirak ne’e ninia operasaun no manutensaun ba oin ho diak. Maibé, ita hotu tenki fo liman ba malu, serbisu hamutuk atu facilidade sira ne’ebé ita simu husi ita nia rain amigu sira, liuliu hirak ne’ebé ita sei simu husi Korea ne’e bele benefisía ita nia povu, liuliu ita nia joven sira”, hateten Abrao.
Iha seremonia asina akordu ne’e hetan partisipasaun hosi Ministru Asuntu Parlamentar no Komunikasaun Sosial (MAPKOMS), Francisco Jeronimo, Ministru Edukasaun, Juventude no Desportu (MEJD), Dr. Armindo Maia, Ambassador Republika Korea mai Timor-Leste, Lee Chin-bum, Diretor Ajensia Kooperasaun Internasional Korea, Kim Sikhyon.
