Reportazen Santina Lucia da Costa
Xefe Estadu Maiór Jenerál F-FDTL, Maijór Jenerál Lere Anan Timur liuhusi nia diskursu deklara katak, veteranus FALINTIL sira ne’ebe ohin loron sei ativu iha FALINTIL-Forsa Defeza Timor-Leste laran, la kontenti ho moris ne’e, tanba laiha justisa kona-ba sira nia estatutu no direitu ne’ebe sira merese.
Maijór Jenerál Lere Anan Timur hateten veteranus F-FDTL sira ne’ebe uluk funu tinan-24 nia laran, ba ita nia independensia nasional, sira nia estatutu no tratamentu hanesan funsionariu publiku baibain de’it, no situasaun sai aat liu, bainhira sira ba reforma tanba ema la tau matan ba sira. Ita haluha tiha sira nia esforsu no sakrifisiu harii nasaun estadu no estadu ida ne’e.
“Forsas Armadas loloos tenke iha estatutu espesial ida ho nia natureza militar duni katak, labele kompara no koalia kona-ba osan operasional ka perdiem , funsionariu publiku sira hetan $40 maibe soldadu F-FDTL sira hetan $10 de’it, ne’e laiha ekilibriu”, hateten, Maijór Jenerál Lere Anan Timur iha nia diskursu, iha Kuartél-Jeneral Fatuhada, Dili 20/08.
Lere dehan veteranu sira ne’ebe to’o ohin loron sei serbisu iha instituisaun F-FDTL nian, ita konta loloos sira halo ona tinan 44 serbi estadu, tinan 24 iha funu rezistensia nia laran no tinan 20 nia laran, iha tempu independensia nia laran.
Lere dehan ho impase politiku ida ne’e, politiku sira liulliu nai-ulun sira taka matan ba problema sira ne’e. Se ohin loron nasaun ne’e estabil, ne’e tanba kontribuisaun boot husi lideres istoriku sira hamutuk ho veteranus FALINTIL sira.
Nia informa ohin loron ema balun hakarak hamosu istoria no inventa istoria, sira dehan katak ukun-an ne’e hahu husi pregu konsulta popular, no sira nega prosesu tomak ne’ebe lao molok konsulta popular. FRETILIN no FALINTIL ne’e patrimonio estadu nian ne’ebe labele husik malu. Ohin loron FRETILIN partidu politiku ida, maibe FRETILIN uluk nia mak matadalan no komanda FALINTIL hodi funu no reziste hasoru invazora sira ba libertasaun nasional no sobreviventes ne’ebe uluk komanda funu mak Kay Rala Xanana Gusmão, Mauhunu Bulerek Karatayanu. FRETILIN no FALINTIL mak laiha karik referendu mos laiha no independensia mos laiha.
“Ita tenki rekoñese katak, uluk FRETILIN mak matadalan no FALINTIL mak liman kroat FRETILIN no povu maubere nian. Ikus mai CNRT moris mai nu’udar produtu unidade nasional no despartidarizasaun FALINTIL nian no lori Timoroan sira ba referendu”, dehan Lere.
