Rede foun ho naran Journalist Against Corruption (JAC) ka Jornalista Kontra Korupsaun (JKK) lansa ohin (20 Marsu), ho membru hamutuk 35 hosi nasaun hitu iha Sudeste-asiatiku, ne’ebe iha komitmentu atu haforsa liutan reportajen kona ba asuntu korupsaun nian iha rejiaun sudeste-asiatiku.
Jornalista 35 reprezenta nasaun 7 iha rejiaun sudeste-asiatiku halibur hamutuk iha Manila, iha loron rua nia laran hodi establese rede jornalista ba anti korupsaun nian mak dedikadu ba halo investigasaun no publika asuntu sira mak relasiona ho korupsaun. Jornalista Kontra Korupsaun lansa ohin, Kuarta feira, 20 Marsu, iha The Bayleaf Intramuros, Manila, Filipina. Rede ida ne’e establese atu sai nudar plataforma nasional no rejional hodi kolabora ba halo investigasaun no sovre sai kazu korupsaun sira no mos fornese opurtunidade formasaun.
“JAC ka JKK mak rede ida ne’ebe lori hamutuk praktisioner sira ne’ebe dedikadu atu investiga no publik asuntu sira mak relasiona ho korupsaun. Ida ne’e plataforma kolaborativu nasional no rejional nian no fornese opurtunidade ba formasaun,” Carmela Fonbuena, Diretur Exekutivu ba Philippine Center for Investigative Journalism (PCIJ), nudar organizador esklarese.
PCIJ mak organiza prosesu sira hodi forma rede ida ne’e liu hosi serbisu hamutu ho United Nations Office on Drugs and Crime (UNODC), hos suporta hosi Governo Sweden nian no mos US International Narcotics and Law Enforcement Affairs (INL).
UNODC mak nudar sekretariadu ba Konvensaun ONU nian Kontra Korupsaun ka UNCAC, instrument universal ida mak kesi legalmente membru estadu sira ne’ebe hola parte iha konvensaun ida ne’e.
Xefe UNODC iha Filipina, Mr. Daniele Marchesi, iha liafuan intervensaun tempu lansa rede ne’e hatete katak “kriasaun JAC/JKK ne’e marka pasu signifikante ida ba oin hodi fahe ba malu ita nia misaun.”
“Jurnalizmu halao papel importante iha luta ida ne’e, kontra korupsaun. Jurnalizmu investigative fo naroman ba kazu korupsaun mak subar hela, husu responsabilizasaun ba sira ne’ebe iha poder no lori injustisa sira ba oin iha diskursu publik nian,” Marchesi hatete.
“Imi nia istoria sei inspira mudansa, influensia politika, no inspira asaun koletivu kontra korupsaun,” Marchesi fo hanoin liutan.
Iha intervensaun Neon Metin nian, Ato Lekinawa Costa, nudar mos Xefe Redasaun hatete katak opurtunidade hamutuk iha rede JAC ne’e atu kontinua lori lia los ba ema kiak sira.
“ita mai iha ne’e, hamutuk iha fatin ida ne’e no forma rede kontra korupsaun ne’e laos tan ita maibe tan ema sira iha kraik ne’eba, ema kiak sira hakarak hetan lia los. Espera jornalista sira iha JAC bele tulun malu halo serbisu ida ne’e no fornese mos formasaun ba ema save sira iha media, no mos sidadaun sira atu partisipa ativu iha luta kontra korupsaun,” Ato Lekinawa esplika.
Jornalista sira ne’ebe mai hamutuk reprezenta sira nia media hanesan Tempo no Projetu Multatuli iha Inodnesia, The Nations and Green News iha Thailand; Sinar Project iha Malaysia, Camboja News iha Kambodia; Neon Metin hosi Timor-Leste, Rappler, GMA News, ho ABS-CBN iha Filipina.
Seremonia kompletu ba lansamentu nian bele haree iha link ida ne’e https://fb.watch/qW8Rr_07z6/
