Ministeriu Saude (MS) ohin loron 24 Abril deteta tan kazu konfirmadu pozitivu COVID-19 hamutuk 69. Liu hosi komunikadu imprensa Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr Rui Maria de Araújo relata ba jornalista sira katak dadus jeral ba loron 24 Abril nian hatudu kazu detetadu COVID-19 foun hamutuk 69 (iha Dili 63 no iha municipio seluk 6).
Kazu konfirmadu kumulativu sura hosi 21 Marsu 2020 to’o ohin loron hamutuk 1808. Husi total kazu detetadu foun ohin mane 44, feto 25. Husi total kazu detetadu foun ohin asintomátiku 63 (91,3%), sintomátiku 6.
Husi total kazu detetadu foun ohin 64 (92,7%) maka deteta tamba halo teste, ho razaun atu halo viajen/ka halo ona viajen ba Munispiu hafoin deteta pozitivu. Maski nune’e, sira ne’ebé rezultadu teste pozitivu husi grupu ida ne’e, maioria sira nia hela fatin, iha duni cluster sira ne’ebé iha kazu detetadu barak iha Munisipiu Dili. Kazu rekuperadu nain 38, total kazu ativu 956, halo teste PCR hamutuk 796.
