Reportajen Agustinha Amaral
Traballador Timoroan na’in 50 hamutuk ho familia asina deklarasaun ho Sekretáriu Estadu Formasaun Profisional no Empregu (SEFOPE) atu ba servisu iha Korea Sul, iha área Fábrika no Peskas.
Sekretáriu Estadu Formasaun Profisional no Empregu, Rogerio Araujo Mendonça hatete, governu liu husi SEFOPE kria ona kondisaun ba trabalhador Timoroan sira ba serivu iha rai li’ur ho objetivu ida katak atu hadi’a kondisaun familia ka uma-laran nian, no segundu atu hadi’a ekonomia rai-laran no hasa’e kresimentu ekonomia rai-laran.
Tan ne’e, Sekretáriu Estadu ne’e husu ba traballador sira bainhira ba servisu kuidadu aan di-di’ak, liu-liu hadook aan husi alcohol, no ba familia husi traballador nian atu uza osan ba kultura halo di-di’ak tan oan sira ba servisu iha área risku no tasi laran.
“Lia menon ba traballador sira ne’ebé atu destaka ba iha Korea Sul, husu ba sira atu hadook aan husi alcohol tanba husi alcohol mak sei estraga sira nia isin. Tau ita boot sira nia hanoin di-di’ak imi nia inan-aman nian iha fatin ida ne’e, esperansa ba ita boot sira moris di’ak ba família no ba nasaun,” dehan Sekretáriu Estadu SEFOPE, iha Salaun Timor Lodge Komoro, Sesta 04/08.
Iha fatin hanesa, Embaixador Korea Sul, Shin Man Taek hatete, ida ne’e hanesan onra boot ida ba embaixador tanba ba dala uluk bele hamutuk ho SEFOPE hodi partsipa iha seremónia asina deklarasaun entre traballador, familia ho SEFOPE.
Tan ne’e, Embaixador ne’e hato’o parabéns ba traballador sira nia esforsu tomak durante ne’e to’o ohin loron, ne’ebe tempo besik sei ba servisu iha Korea Sul.
“Parabens ida ne’e mos signifika katak ita boot sira ajuda Korea bele halo hodi prense servisu sira ne’ebé mak agora da-dauk mamuk hela iha Korea, entaun ita boot sira mos ajuda korea,” dehan nia.
Shin Man esplika, oportunidade ne’e hanesan osan-mean ba traballador sira atu aproveita oportunidade atu dezenvolve aan fo haksolok ba familia no kontribui ba nasaun Tiom-Leste.
“Ita boot sira sei aranka ba servisu iha fatin ne’ebé dook tebes, tan ne’e ha’u nia mensajen ba ita boot sira, ba servisu karik kuidadu an, saúde, seguransa atu nune’e ba ho isin di’ak no fila mos ho isin diak,” nia hato’o ba traballador sira.
Embaixador ne’e mos husu ba traballador sira maske iha Timor sira aprende ona lian Korea báziku maibé nafatin kontinua aprende tanba iha instituisaun ne’ebé de’it komunikasaun entre ema ho ema ne’e importante.
Trabalhador Francisco Pedroco Martins Borges katak orgulho tebes tanba sira na’in 20 bele hetan oportunidade dala rua ba servisu iha Korea, iha área peskas nian, nia agradese tanba oportunidade ida ne’e bele hadi’a família nia moris no kontribui ba nasaun.
“Ami ne’ebé hetan oportunidade ba servisu dala rua iha Korea tanba servisu maka’as, badinas tanba ne sira mos fo fiar mai ami ba bele servisu tan tinan lima, ami senti orgulho no kontenti tebes.”
Nia lia menon ba família mak halo orasaun ba sira, tanba sira ba la’os servisu ba sira nia aan maibé ba família nomos ba nasaun.
Iha fatin hanesan traballador Domingos Lopes Castilho, ne’ebé sei servisu iha área Fábrika hatete, senti kontenti no tristi, tristi tanba husik hela família, kontenti tanba buat ne’ebé durante nia hakarak no esforsu ohin loron hetan no sai realidade duni.
“Durante formasaun ne’e ami hasoru dezafiu barak maibé ami senti di’ak hela tanba iha dezafiu no terus nia laran mak ita bele hetan susesu no realidade ne’ebé ita mehi no agradese tanba bele hetan oportunidade ba tan dala rua.”
Nia lia menon ba kolega joven iha Timor laran katak, labele lakon vontade atu tuir formasaun sira hanesan ne’e no labele ansi tanba oportunidade sei mai, karik ba alin sira ne’ebé remata ona eskola iha sekundária karik ekonomia familia la suporta kontinua eskola, entaun dala di’ak liu hakbesik aan ba sentru formasaun sira aproveita tuir formasaun.
“Tanba ita moris nafatin iha ita nia rain de’it, hanesan joven ita sei depende ba inan-aman, ita presiza sai ba rai li’ur atu nune’e bele muda ita nia moris no bele rezolve ba nesidade familia nian.”
