Reportajen Silvino Freitas
Ministru Juventude Desportu Arte no Kultúra (MJDAC), Nelio Isac Sarmento hala’o abertura formasaun iha area hospitalidade ba joven nain 34 iha East Timor Development Agency (ETDA) no joven sira ne’e maioria mai husi universidade, nune’e MJDAC husu atu aproveita tempu hodi aprende oportunidade ne’ebé estadu oferese.
MJDAC Nelio Isac Sarmento haktuir, liuhusi formasaun ne’e nu’udar parte ida atu aumenta skill joven sira nian hodi bele responde ba merkadu, nune’e MJDAC iha nia programa rasik ne’ebé bele enkoraja skill joven sira nian liuhusi formasaun oioin maibé antes ne’e iha ona kooperasaun ho ETDA atu ajuda hasae skill joven sira nian iha area hospitalidade.
“Hau bele dehan katak durante tinan barak nia laran hala’o kooperasaun ho ETDA ne’e ami prodúz ona joven lubuk ida iha area hospitalidade ne’ebé responde kedan ba iha merkadu, husi formasaun sira ne’ebé ami hala’o kada periodo ami haruka joven nain 30 tuir formasaun iha ETDA maioria mak hetan kedan servisu, balun ema mak bolu sira no balun sira mak buka rasik vaga ema simu sira” dehan Nelio hafoin hala’o abertura ba formasaun hospitalidade iha ETDA Fatuhada, (04/08).
Nelia dehan, iha tinan ida ne’e joven hamutuk 34 ne’ebé sei tuir tan formasaun iha area hospitalidade, nune’e sira bele ba servisu iha atendimentu hoteis no restaurante sira, husi ne’e bele prepara sira bainhira merkadu presiza joven sira ne’e iha ona skill, joven sira ne’ebé tuir formasaun la’ós mai husi eskola sekundária de’it maibé balun mai husi universidade ho livre teoria, sira bele aprende liu tan iha area hospitalidade nian.
“Hau orgullu tanba balun husi fakuldade agrikultura, edukasaun no polítika balun husi turizmu duni ne’ebé sei tuir kursu iha ne’e, tanba ne’e ohin hahú formasaun ne’e iha fulan 3 tan ita sei mai haree sira nia progressu aprende ne’ebé sira simu husi formadór sira” Nelio dehan.
Nelio mós fó mensajen ba joven sira katak, estadu la presiza atu sira halo buat di’ak ba estadu, maibé husu de’it sira nia tempu atu bele aproveita oportunidade ne’ebé estadu fó hodi mai tuir kursu sira ne’ebé bele hasa’e sira nia kapasidade iha area hospitalidade nian.
