Reportajen Adroaldo “Saretukau”
Nelson M. Gonçalves, “ha’u iha momentu ne’ebá ha’u servisu iha imigrasaun, iha aeroportu, ha’u hasoru direita Amu Papa iha ne’ebá, nia fo ha’u rekordasaun ida de’it, nia rekordasaun ne’ebé ha’u hetan ne’e mak tersu iha aeroportu ne’ebá.”
Nelson sente triste ho sua Santidade Papa Francisco nia viajen ikus iha mundu ida ne’e. “Sente lakon aman, ne’ebé ita la espera, agradese tebes tanba nia sei vizita ita-nia rain. Sente triste tan lakon!” Espresa Nelson ho triste ba Neon Metin iha Misa Requiem Papa Francisco iha Tasi-Tolu, sábadu, 26 Abril, 2025.
“Ha’u lembra ha’u lori duni ha’u nia selendang ida, ha’u hakilar ba sua Santidade, haruka nia fo bensaun, nia fo tiha bensaun remata, nia fo ha’u tersu ho gantungan kunci.” Haktuir Nelson ne’ebé tuur hela iha altar oin Tasi-Tolu hodi Rona Misa no hatur Papa Francisco nia foto no tersu ne’ebé nia simu hosi Papa iha nia oin, hale’u ho lilin ne’ebé sunu lakan hela.
“Nia fo tiha bensaun mai ha’u, ha’u sei husu tan bensaun ba ha’u nia família ho ha’u-nia kolega sira hotu”, nia haksolok tebes.
Nelson sente simu grasa wa’in tebes tanba hosi ema rihun resin, nia bele hetan bensaun direita hosi Sua Santidade Papa Francisco iha aeroportu Nicolau Lobato, Dili, iha loron 9 fulan Setembru, 2024, wainhira Papa mai vizita Timor.
Nia mensajen, nu’udar kristaun ida tenki kria paz no unidade iha família, labele kria problema.
Nia esperansa ba Amu Papa foun, atu banati Papa Francisco nia legadu sira. “Tanba Amu Papa ida ne’e la haree ba relijiaun, la haree ba kor, la haree saída de’it, nia hakarak kria paz no dame.”
Ba Misa Requiem ne’e, Bispo selebrante, Dom Leandro Maria Alves, hatete, ohin ita hamutuk fila-fali iha fatin ida ne’e hodi hasa’e sakrifisiu eukarístiku ba Maromak tanba Maromak halo ita experimenta liuhosi Amu Papa mai vizita ita-nia rai doben Timor-Leste.
“Sua Santidade Papa Francisco nu’udar ema ida ne’ebé simplisidade, haraik-an, hakuak ema hotu ho oin midar, inklui natureza.”
Dom Leandro dehan, ita Timor-oan tenki agradese tanba ita mak nia destinu ikus ba vizita mai Timor iha rai santu ida ne’e, nia hamnasa ho ita no husik mensajen furak no bensa mai ita Timor-oan, “ita sente haksolok tebes bainhira rona Amu Papa dehan nia laran monu ba Timor-Leste, lia-fuan ne’e espesial no úniku ba Timor-oan, tanba lia-fuan ne’e Amu Papa la temi iha rai seluk maibé so temi de’it mai ita Timor-Leste.”
“Amu Papa nia prezensa ne’e halibur tebe-tebes Timor-oan sira hotu halibur malu, fiar metin ba Na’i no kultura iha ita-nia rai Timor. Amu Papa dehan Timor rai ki’ik simples hamnasa dor, fiar na’in no iha kultura oin-oin, Amu Papa mos husu ba Timor-oan fó liman ba malu, hadomi malu, fiar metin hodi lori Timor ba oin.”
