Reportajen Umbelina dos Reis
Sekretariu Estadu Formasaun Profesional no Empregu (SEFOPE), Liuhosi Diresaun Nasional Empregu Estranjeiru (DNEE) realiza konferensia imprensa hodi anunsiu kritériu loke vaga online ba Timor oan sira ne’ebe atu halo aplikasaun, hodi ba servisu iha Nova Zelandia, iha area ortikultura no vitikultura. Nune’e Sekretáriu Estadu Formasaun Profisional no Empregu husu ba joven foinsa’e sira tenki aproveita oportunidade ne’e ho di’ak.
Sekretáriu Estadu Formasaun Profesional no Empregu (SEFOPE), Rogério Araujo Mendonça hatete, ohin loron 08 -12 setembru ofisialmente loke vaga online halo rekrutamentu ba traballador Timor oan sira ne’ebe sei ba servisu iha nasaun Nova Zelandia ba programa RSE nian.
” Husu ba joven foinsa’e sira hotu-hotu tenki uza oportunidade ida ne’e ho diak, hatudu abilidade ho kompetensia no kualifikasaun atu nune’e bele responde ba merkadu traballu iha nasaun Nova Zelandia” Dehan Sekretáriu Estadu Formasaun Profesional no Empregu (SEFOPE), Rogério Araújo Mendonça, hafoin halo konferensia imprensa no publikasaun ba vaga Online.
Iha fatin hanesan, Diretor Ezekutivu Diresaun Nasional Empregu Estranjéiru João Correia Pereira, liuhosi konferensia imprensa hateten, bemvindu mai aplikasaun online ba Programs Empregador Sazonal Rekoñesidu (RSE) ba Nova Zelandia. Programa ne’ebé estabelese atu fó apoiu ba nesesidade traballador sazonal sira iha indústria Ortikultura no Vitikultura ba Nova Zelandia nian, enkuantu mós fornese oportunidade empregu temporáriu ba traballador sira hosi nasaun parseiru iha illa pasifiku siri no Timor-Leste.
“Nune’e ami emkoraja tebes ita-boot sira tenki le di-di’ak informasaun no rekizitu sira hotu, molok atu hal aplikasaun, nune’e bele ajuda asegura katak ita-boot komprende kritériu elejibilidade nian no ba dokumentu suporta hotu-hotu ne’ebé prontu ona.” Dehan Diretor Ezekutivu Diresaun Nasional Empregu Estranjéiru (DNEE), João Correia Pereira, ba Jornalista sira liuhosi konferensia imprensa, iha edifísiu SEFOPE Caicoli, segunda-feira, 08/09.
Nia informa, Periodu aplikasaun ba Programa RSE sei loke hosi loron 8 – 12, fulan setembru, 2025. Antes halo aplikasaun haree dokumentu sira ne’ebé presiza hatama validu. Kondisaun importante ba aplikasaun ba vaga Online Programa RSE tenki sidadaun Timor oan. aplikante sira tenki idade 21 anus, ba leten, no profisiénsia Inglés tenki iha lisensiatura/diploma Inglés ka sertifikadu Lian Inglés.
” Durasaun empregu tuir programa RSE ho nia durasaun ba fulan 6-7, hafoin kompleta periodu ida, tenki fila mai Timor-Leste mais ou menus durante fulan 4 molok elizivel ba kontratu. Kondisaun servisu limita ba area ortikultura no vitikultura de’it, laiha tipu empregu seluk nune’e permite tuir vistu RSE duni.” Nia dehan.
Nia informa, oras servisu minimu 30 oras kada semana, ou oras 30 média kada semana durante semana haat ne’e 120 oras kada fulan. Nune’e tenki prepara an ba klima temperatura oi-oin, hosi besik 7°C iha tempu Invernu fulan Jullu to’o besik 34°C iha tempu Veraun Nune’e remunerasaun ba taxa salariu atual ba traballador RSE sira nia minimu maka NZD $23.15 kada oras. Exijensia fiziku tenki bele foti no lori ai-fuan, modo sira ne’ebé maka todan, nune’e servisu repetetiva sira hanesan dobrada/hakruuk, hili/ku’u no tesi/koa, nune’e presiza nivel kondisaun fiziku ne’ebé saudavel.
Nia informa, dokumentu hotu-hotu tenki submete ka upload ho versaun dokumentu iha PDF no koloridu, pasaporte tenki válidu pelumenus fulan neen ba leten, sertifikadu rejistu kiriminal neʼebé validu ho versaun lian Inglés, sertifikadu lian Inglés/ diploma, kartaun evidensia hosi SEFOPE, billete Identidade (BI), kartaun eleitoral (KE), sertifikadu vasinasaun COVID-19, sertidaun RDTL ka Birth Certificate, foto perfil kompletu, whole body, seluruh badan.
“Ba hirak ne’ebé seidauk iha sistema bele kompleta no submete ita-bo’ot sira nia dokumentu ba iha link refere: https://timorleste.pacificlabour.org/register tuir loron neʼebé determina ona. Se rejista ona iha sistema PALM nian, labele rejista online ba Programa RSE ne’e, tanba Ita nia profile sira rejista ona iha Sistema PALM (IRD System), no bainhira ita halo aplikasaun. Nune’e pasiensia no koko fila-fali, bainhira halo rejistrasaun online ba iha Sistema programa RSE, link neʼebé ita asesu ba, tanba problema ou lao neneik (loading hela) ho razaun slot ba aplikasaun refere iha nia limitasaun ba asiste.” Nia dehan.
Nia konklui, SEFOPE liuhosi diresaun nasional empregu estranjéiru, sei la halo atendimentu ba rejistu manual. Aplikasaun hotu-hotu tenki halo ho via online ou liuhosi email no link ne’ebé mensiona ona iha leten, aplikasaun ne’e hahu hosi ohin 08 to’o 12 setembru 2025.
