Reportajen Silvino Freitas
Uniaun Estudante Universitariu Munisipiu Ermera (UNEUMER) konsidera deputadu sira iha parlamentu nasional laiha seriedade atu deskuti problema prioridade neebe povu infrenta maibe buka previlejiu ba sira nia interese no bainhira halo diskusaun deputadu sira vota hotu ho kartaun mean ba asuntu hadia estrada maibe diskuti ba sosa prado deputadu hotu hotu vota ho kartaun modok.
Portavos Sergio Ximenes da Costa dehan, sira lamenta tebes ho politika deputadu sesta lejislatura iha parlamentu nasional neebe neebe lori orsamentu privativu hodi sosa karreta prado unidade 65 ba deputadu sira tanba deputadu sira nee reprezenta povu timor leste iha uma fukun referen, tenke deskuti ba dezenvolvimentu nasional liuliu haree ba asuntu ekonomia saude no edukasaun iha timor leste neebe afeta diretamente hosi povu neebe hanesan nain ba estadu RDTL.
“parlamentu nasional laiha seriedade ba deskuti problema prioridade neebe povu timor leste infrenta iha prosesu dezenvolvimentu nasional maibe pelo kontrariu sira dekuti no aprova fali orsamentu privativu hodi sosa karreta prado, mezmu sira hela deit tinan 2 atu termina mandatu” dehan, Portavos Sergio Ximenes da Costa liuhusi komunikadu imprensa neebe halao iha jardin 5 de maio, (11/09).
Nia dehan tan, tuir dadus neebe estudante sira asesu timor leste moris iha lina pobreza nian ho 48,2% seidauk iha kualidade edukasaun falta asesibilidade ba asesu no bee-moos no taxa inseguransa aihan 27% husi populasaun 360,000 mal nutrisaun iha tinan 2024 ho 47% inklui dezempregu 1,60%, asesu ba estrada rural no urbana neebe nafatin iha problema partikulamente enfrenta iha munisipiu Ermera maibe deputadu sira moris ho direitu regalia oioin hanesan simu lap-top, prado, simu subsidiu ba kombustivel, alojamentu, tratamentu saude, serbisu politika ho moss salariu mensal neebe montante boot.
“husi nee UNEUMER konsidera deputadu sira iha parlamentu nasional halo traisaun ba prinsipiu bem-estar social ka moris diak povu nian, la halo fiskalizasaun no la buka dadus sira tuir kondisaun real iha timor leste” dehan Portavos Sergio Ximenes da Costa.
Fatin hanesan estudante Apolinario de Jesus dehan, dadaun povu barak infrenta hela sofrimentu oioin hanesan iha munisipiu Ermera estrada sira neebe grave tebes nakonu ho rai-rahun no alstra makaas ba povu sira neebe hela besik impaktu ba sira nia saude publika, ironika tebes kuandu deskuti atu halo estrada iha munisipiu hotu hotu vota hiit kartaun mean maibe vota atu sosa kareta prado hotu hotu kartaun modok deit, hodi hatudu katak deputadu sira nakonu interese privadu.
“ita haree ba realidade karreta sira neebe kompana no karreta privadu sira nee halo rotasaun ba mai iha kada munisipiu tinan 10 too 20 halai iha dalan la diak maibe kondisaun diak hela, karreta neebe dadaun nee deputadu sira uza nee uza dader ba servisu lokraik fila mai uma karreta nee seidauk at nusa osan nee la koloka ba iha seitor privadu sira no agrikultor sira” dehan estudante Apolinario de Jesus liuhusi konferensia imprensa iha jardin 5 de maio, (11/09).
