Reportajen Silvino Freitas
Prezidente Uniaun Estudante Universitariu Munisipiu Ermera (UNEUMER) konsidera Polisia Nasional Timor Leste (PNTL) seidauk iha kapasidade atu interpreta norma administrativu manifestasaun nian, tanba nee Estudante Universitariu Timor Leste (EUTL) mantein sira nia pozisaun ba asaun pasifika iha segunda feira loron 15 fulan setembro iha areador kampus sentral Univesridade Nasional Timor Lorosa’e (UNTL) no pronto ona atu hetan kapturasaun hodi bele hasoru malu iha tribunal.
Prezidente UNEUMER Zaqueu Maia de Araújo dehan, forum kolektivu ba massa luta kontra politika parlamentu nasional sosa karreta prado nee hamosu ona orgaun jeral maka orgaun EUTL, tanba nee EUTL submete ninia karta tuir ordenamentu juridika tuir koridor legal neebe vinkula iha teritoria nasional estadu RDTL nia laran ho avizu konesimentu ba PNTL maibe la signifika katak PNTL iha kompetensia atu desidi lei numeiru 1/2006 la fo kompetensia atu desidi for a 100 metru no lei nee la mate deit ho 100 metru maibe iha alina balun nee koalia iha prosesu balun.
“estudante mantein kontinua avansa iha resintu UNTL ho autonomia kampus demokrasia kampus nian, oresik koordenador EUTL esplika klaru ona lei avizu previa fo ona ba polisia antes atu mosu manifestasaun loron 4 nee hatoo ona ba iha polisia, polisia iha nia kompetensia atu haree indisius ruma objesus ruma hatoo iha loron rua nia laran notifika no informa promotores ba demostrasaun loron rua mais polisia la halo ida nee” dehan Prezidente UNEUMER Zaqueu Maia de Araújo iha jardin 5 de maio (11/09).
Nia esplika, liu tiha fali rua polisia liuhusi via telephone deit lei hateten fundamenta karta neebe promotores sira hatoo liuhusi eskritu lori ba hela fatin promotores sira nian ikus polisia desidi tuir nia vontade hodi haruka demostrante sira iha dia 15 atu halo iha tasi-tolu nee laiha lojika wainhira hamate demokrasia iha rai laran no polisia nia kapasidade minimu tebes atu interpreta norma sira nee tanba tenke notifika iha loron 2 nia laran para norma sira nee fo espasu ba promotores sira hodi halo rekursu ba tribunal, tuir tan lei numeiru 1/2006, 8 de fevereiru nee hateten iha artigu 16 promotores sira iha direitu ba fali iha tribunal buka direitu maibe ida nee polisia la halo.
“hau la hatene komandante ninia asesor ida neebe maka interpreta norma administrativu ida nee, hau hanoin UNEUMER pozisiona nia an katak dia 15 mantein nia pozisaun autonomia kampus UNTL kampus nee povu nian laos sira nain 65 nia osan no mos komadante nia osan, dia 15 saida mak akontese ba joven sira ita pronto atu hasoru, ami halo iha koridor legal iha seguransa juridika nia laran prosesu ruma tribunal mak fatin ba ita hasoru malu” dehan Zaqueu Maia de Araújo.
Antes nee iha PNTL bolu ona promotor sira ba manifestasaun sira hamutuk nain 5 hodi husu sira atu halo manifestasaun iha tasi-tolu maibe portavos EUTL Natilico Nunes deklara ho pozisaun katak iha dia 15 setembru asaun pasifika konitinua lao ho asaun neebe dignu, edukativa, saudavel hodi kontra politika parlamentu nasional nian atu sosa karreta prado, maske polisia deklara sei halo kapturasaun ba estudante sira iha dia 15 bainhira mantein halo manifestasaun maibe asaun pasifika nee sei lao pronto atu polisia kaptura no dalan ikus maka hasoru malu iha tribunal tanba sira halo asaun iha koridor legal nia laran.
