Reportajen Silvino Freitas
Lalenok ba Ema Hotu (LABEH) hamutuk joven no estudante sira komemora loron mundial anti korrupsaun liuhusi marsa atu fanu espiritu joven sira nian luta hasoru korupsaun, tanba durante nee LABEH mos luta hasoru korrupsaun.
Reprezentante LABEH Ano Pereira dehan, loron 9 Dezembru maka loron mundial ba anti korupsaun nunee kada tinan LABEH sempre konsidera loron nee importante hodi komemora laos iha timor leste deit maibe iha mundu mos komemora loron refere tanba nee mak sira komemora atividade simples refere nunee karik iha tinan oin maka iha atividade boot liu maka sira sei konvida joven sira hotu atu komemora.
“ami foti tema nee hodi reflete ba tinan tinan,atu sai lian ba maluk juventude sira hodi bele koalia, ami koalia iha media no publiku ho mos mundu tomak liuliu ba joven sira neebe maka asiste marsa ida nee” dehan Reprezentante LABEH Ano Pereira iha LABEH Comoro, (09/12).
Nia dehan tan, tuir observasaun LABEH nian haree ba dezenvolvimentu lao hakdasak tanba iha impaktu husi korupsaun nunee LABEH dezenvolve rasik sira nia joven sira atu bele kontra korupsaun sira neebe akontese iha ita nia nasaun, nunee LABEH kontinua konvida joven sira atu kontra korupsaun no husu ba ukun nain sira atu serví nasaun ho fuan ho laran, nunee LABEH mos hatoo keixa balun neebe sira akompana ba parte relevante hanesan KAK hahu husi 2003 too mai dadaun nee.
“durante nee KAK halao hela nia servisu maibe tanba nia enkaixa hela iha governu nia okos entaun nia labele hamriik direitamente, tanba nia most auk atu foti kazu ruma ba iha publiku ka tribunal entaun nia mos tetu didiak lai tanba nia assume hela kargu iha estadu nia okos” dehan Ano Pereira.
Entretantu LABEH komemora loron mundial ba korupsaun hamutuk ho estudante no juventude halao marsa husi edifisiu LABEH Komoro ba rotunda Prezidente Nicolao Lobato fila fali ba edifisiu LABEH nian, nunee komemora nee ho tema ‘hamutuk ho foinsa’e luta hasoru korrupsaun hodi garante integridade futuru’ hodi fanu joven sira nia espiritu luta hasoru korrupsaun.
