Reportajen Estasiáriu Cristiano dos R. Gama
Universidade Nasionál Timor Lorosa’e (UNTL) liu husi Departamentu Komunikasaun Sosiál (DKS) iha Fakuldade Siénsia Sosiais no Polítika (FCSP), lansa podcast foun ida hanesan plataforma atu diskuti no buka solusaun ba kestaun akadémika no sosiál ne’ebé relevante iha sosiedade.
Diretora Departamentu Komunikasaun Sosiás, Constancia Sofia Cornélio Barros de Jesus, hatete, inisiativa ne’e la’os de’it atu selebra liberdade imprensa, maibé mós hanesan meiu ida atu habelar informasaun ne’ebe maka kualidade ba povu.
Tanba ne’e, ohin ofisialmente lansa podcast ho naran “Komunikasaun Amudansa” hodi selebra mós Loron Mundiál Liberdade Imprensa. Lansamentu ne’e akompaña ho semináriu ida ne’ebé foka ba papel jornalizmu dijitál iha dezenvolvimentu nasionál.
“Objetivu husi atividade maka primeiru ita komemora loron liberdade imprensa, no ita foti tema jerál hodi komemora loron liberdade imprensa maka ‘Papel Jornalizmu Dijitál iha Dezenvolvimentu Nasionál’. Ita lansa podcast ne’e ho razaun ita komunikasaun atu buka solusaun no fó solusaun ba buat ruma,” dehan Diretora DKS-UNTL, Constancia ba Jornalista sira iha Auditoriu FCSP Kaikoli, Seunda 4/05.
Nia esplika, maske foin hahú ho fundus limitadu husi kaixa ki’ik departamentu nian, projetu ne’e hetan ona atensaun husi Reitór UNTL ne’ebé promete sei fó prioridade iha futuru, inklui planu hodi harii estúdiu ki’ik ba komunikasaun Sosiál. Podcast ne’e rasik sei hahú gravasaun iha semana oin hodi konvida Reitór no Dekanu sira atu diskuti kestaun akadémika no sosiál ne’ebé iha relevante.
Iha fatin hanesan, reprezentante Prezidente Konsellu Imprensa Timor-Leste (KITL), Albérico da Costa Júnior, mos hateten, Timor-Leste presiza servisu hamutuk hodi hadi’a fali índise liberdade imprensa nian ne’ebé tun ona ba kategoria “avizu kinur”, hafoin iha tinan 2023 konsege tama iha Top 10 iha mundu.
“Komunidade akadémika tenke sai krítiku no uza podcast ne’e nu’udar instrumentu ba kontrole sosiál. Konsellu Imprensa husu estadu tenke sai fali protetór ba liberdade imprensa, la’ós fali sai fali ameasa,” dehan Albérico.
Nia mós rekomenda katak podcast foun ne’e sai hanesan laboratóriu prátiku ba estudante sira iha UNTL hodi dezenvolve sira nia kompeténsia hanesan téknika entrevista, sai host no hakerek notisia ne’ebe di’ak ho kualidade.
Nune’e mos estudante finalista Komunikasaun Sosiál, Aida da Costa Amaral, agradese no sentimentu orgullu tanba maske besik ona atu graduata, maibé hola parte bele kontribui hamutuk ho dosente, alumni, no estajiáriu sira hodi realiza podcast ida ne’e iha departamentu komunikasaun.
