Reportajen David da Costa
Governu ohin liuhosi Ministériu Agrikultura, Peska, Pekuária no Floresta (MAPPF), fó lisensa bá kompañia nasionál rua, Rayhana no Comodities X Change, Lda., hodi hala’o atividade kaer ikan iha área tasi Timor-Leste nian.
Iha Komunikadu ofisiál ne’ebé Neon Metin sita husi Media Gabinete Primeiru Ministru, PM kay Rala Xanana Gusmão, hateten, Governu la’ós de’it fó lisensa atu kaer ikan, maibé mós preokupa oinsá produtu peska sei distribui no transforma atu aumenta valór ekonomia no evita fa’an ikan fresku de’it iha merkadu.
“Ha’u lakohi entrega de’it buat hotu. Ha’u nia preokupasaun maka tuir planu ne’e ró sira sei ba kaer ikan kada semana rua. Karik lori ikan barak mai Dili, tenke iha planu atu prosesa no preparasaun ba merkadu,”dehan PM Xanana Gusmão iha Lansamentu ofisiál bá ró peska fibra vidru semi-indústria iha aredór Unidade Polísia Marítima (UPM), Lecidere, Dili, segunda 20/07.
Nune’e mós Ministru Agrikultura, Peska, Pekuária no Floresta, Marcos da Cruz, esplika atribuisaun lisensa ba kompañia lokál rua ne’e hatudu kompromissu Governu nian atu fó oportunidade ba emprezáriu nasionál hodi partisipa diretamente iha dezenvolvimentu seitór peska.
Tuir ministru, Timor-Leste iha liña kosteira naruk kilómetru 735 no Zona Ekonomia Eskluziva ho luan kilómetru kuadradu 72.000.
Poténsia rekursu peska atinje to’o 718.900 tonelada kada tinan, maibé durante ne’e foin esplora serka 2%, enkuantu parte boot seluk lakon tanba atividade peska ilegál.
Ró ne’ebé lansa hamutuk haat, kompostu hosi ró rua pertense bá Rayhana, ida bá Comodities X Change, Lda., no ida pertense ba Governu.
Ró Governu nian sei uza atu monitoriza no kontrola atividade ró peska sira ne’ebé simu lisensa no mós apoiu fiskalizasaun bá peskadór sira.
Na’in ba Kompañia Rayhana, Ricardo Nheu sente kontente ho oportunidade ne’ebé IX Governu Konstitusionál fó ba emprezáriu nasionál atu investe iha seitór peska.
Nia promete hala’o atividade ho responsabilidade no servisu hamutuk ho entidade relevante sira atu supera difikuldade ne’ebé bele mosu.
Iha serimónia ne’e, Governu mós entrega sertifikadu lisensa no ekipamentu GPS ba ró sira, atu fasilita monitorizasaun no kontrolu atividade peska.
