Reportazen Zevonia Vieira
Pandemia virus Corona, sai preokupasaun iha mundu global tanba kada loron numeru ema mate iha nasaun boot sira sempre sae. Ohin loron professional suade sira iha mundu tomak, selebra loron internasional saude nian, maibe iha Timor-Leste rasik labele selebra tanba surtu virus Corona ne’ebe mak iha ona Timor.
Relasiona ho loron mundial saude nian, Neon Metin halo konfirmasaun ho portavoz Centru Integradu Jestaun Krize [CIJK], Dr. Rui Araujo konaba alende moras Corona, karik iha moras seluk ne’ebe mos iha risku boot ba ema nia moris, iha situasaun agora liu-liu iha Timor-Leste?
Ba Neon Metin Dr. Rui hatan katak agora iha Timor-Leste moras Dengue mak agora iha surtu makaas, iha Municipiu Ermera no Dili kazu aumenta barak.
“Portantu moras hadaet seluk ne’ebe agora barak tebes iha Timor-Leste nia laran mak Dengue, iha mos kazu balun ema ne’ebe hela iha kuarentena depois hatudu sintomas no isin manas, maibe halo teste nia rezultadu negativu no wainhira halo teste ba Dengue nia hetan positivu. Portantu moras ne’ebe hadaet agora makaas ne’e Dengue”, hateten Dr. Rui iha CCD, 07/04.
Dr. Rui mos hateten Tuberkulosis ka TBC sei makaas nafatin iha Timor-Leste no moras hadaet sira seluk ne’ebe sei iha, moras ne’ebe la hadaet mos sei makaas tebes, tanba ne’e mak Centru Integradu apela ba populasaun tomak, atu ita hadook an hosi moras ida ne’e tan, hodi labele komplika liutan situasaun ne’ebe oras ne’e dadauk ita infrenta iha saude Timor-Leste.
Relasiona ho loron mundial Saude nian, CIJK aproveita oportunidade ida ne’e hodi hatoo parabens ba professional saude no ofisional saude iha Timor-Leste, ne’ebe serbisu makaas tebes atu bele prevene moras ida ne’e tama barak liutan no hadaet makaas liutan iha TL.
CIJK mos enkoraza boot ba professional saude sira, atu dedika an tomak ba serbisu iha area saude. Hato’o agredesementu ba publiku, hahu hosi lideransa komunitaria mai to’o lider nasional sira ba kontribuisaun tomak ne’ebe halao durante fulan 3 nia laran, atu TL bele prepara an didiak, hodi prevene moras Corona.
“Serbisu sei barak, dalan sei naruk maibe iha loron mundial saude nian, hakarak apela ba ema hotu katak saude importante, saude iha ita nia liman rasik no ita hotu presiza fo liman ba malu atu serbisu ba saude idak-idak nian no mos saude ita hotu nian”, hateten Eiz Primeiru Ministru ba jornalista sira.
