Reportazen Francisco JDA
Relasiona ho pagamentu subsidiu ba komunidade suku Camea, tuir orariu katak ba loron 9 Junhu, sei foka ba iha aldeia Kaisabe, ho dadus benefisiariu hamutuk 109.
To’o oras ne’e dadaun suku Camea selu ona Uma Kain hamutuk 98, ba Subsidiu $200 no la iha problema no reklamasaun, tanba komunidade hirak ne’e orijinál. Maibé iha mak reprezentante hosi familia rasik ne’ebé moras ka labele la’o, hodi simu subsidiu nune’e reprezentante mak mai simu iha sede suku.
Xefe Suku Camea Matos da Costa ba Neonmetin informa katak, dadus provisorio no permanente ne’ebé submete ba Ministeriu Solidariedade Sosial no Inklusaun (MSSI) hamutuk 3109, maibé simu fali dadus Hosi MSSI ne’e ba aldeia 9 no aldeia 2 hanesan Has Laran no Ailele- Hun lista naran la iha totál.
“Tuir informasaun prosesu ne’e la’o hela, sira komesa hadia fali dadus ne’e. Osan ne’ebe simu orseik ne’e hamutuk $322,200 ba benefisiariu hamutuk 1611, osan ba suku Camea Pas no la liu”, deklara Xefe Suku Camea Matos da Costa.
Matos da Costa realsa tan katak durante komunidade suku Camea ne’ebé mai, benefisia osan $200 dollar ne’e, kontinua garante nafatin distansiamentu sosial no fiziku, nune’e fase liman nafatin, nafatin fo prioridade ba ema ho difisensia, inan isin rua no sira ne’ebé idade avansadu liu.
