Reportazen Santina Lucia da Costa
Xefe Estadu Maiór Jenerál Falintil-Forsa Defeza Timor-Leste (F-FDTL), Majór Jenerál Lere Anan Timur halo enkontru regular ho Prezidente Republika, Dr. Francisco Guterres Lu-Olo hodi relata informasaun situasaun rai laran no prevensaun COVID-19.
Hafoin enkontru Xefe Estadu Maiór Jenerál FALINTIL- Forsas Defeza Timor-Leste (F-FDTL) ba jornalista sira informa katak situasaun rai laran lao di’ak, laiha konflitus, laiha disturb no kazu laiha oho malu. Konaba prevensaun hosi Corona virus, Lere Anan Timur dehan desde Prezidente dekreta Estadu Emerjensia (EE) to’o ohin loron sedauk rejista ema mate maibe sei rejista nafatin ema tama illegal hosi fronteira.
“Primeiru ita tenki reforsa serbisu seguransa Fronteira ninian, hanesan Estadu Emerjensia governu fó ordem taka fronteira, tantu Aeroportu ne’e los ona, maibé hau bele dehan katak, liña Fronteira ne’e luan no naruk, defisil kontrola, ita nia ema mós la to’o maibé PNTL ho F-FDTL komandu rua ne’e tur hamutuk ona atu reforsa tan pozisaun”, informa Lere Anan Timur, iha Palasiu Prezidensial, Nicolau-Lobato, Bairu-Pite, 20/01.
Xefe Estadu Maiór Jenerál F-FDTL husu ba governu reforsa medidas administrativas, por ezemplu ema ne’ebé liu husi dalan illegal, sá medida mak tenki fó, labele mai kuarentena de’it, ita labele halimar ho COVID-19, tenki kriminaliza tanba virus ne’e oho ema.
Lere dehan Prezidente Republika, Dr. Francisco Guterres Lu-Olo konkorda hodi reforsa medidas preventivas, ba ita nia populasaun sira ne’ebé ké indisplinar sira ne’e, tenki toma medidas seriu ba sira.
