Reportazen Zevonia Vieira
Ekipa vijilansia Ministeriu Saude ohin loron 20 Marsu deteta tan kazu konfirmadu COVID-19 hamutuk nain 19, liu hosi zoom press conference Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo informa ba jornalista sira katak evolusaun surtu COVID-19 iha municipio Dili, deteta kazu foun COVID-19 hamutuk 19, ho detalles tuir mai katak kazu pozitivu 3, kontaktu-besik ho kazu konfirmadu iha BTN III, Aldeia Terra Santa, Suku Madohi, Postu Administrativu Dom Aleixo.
Kazu pozitivu 1, kontaktu-besik ho kazu iha cluster Aldeia Maucocomate, Suco Becora, Posto Administrativo Cristo Rei. Kazu pozitivu 2, kontaktu-besik ho kazu konfirmadu ida iha cluster HNGV, hela iha Aldeia Berbidu, Suku Becora, Posto Administrativu Cristo Rei. Kazu pozitivu 1, hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu ida ne’e kontaktu-besik ho kazu iha cluster Aldeia Lirio, Suco Motael, Posto Administrativo Vera Cruz.
Kazu pozitivu 10, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan. Kazu pozitivu 1, hela iha Aldeia Grilos, Suku Gricenfor, Postu Administrativu Nain Feto. Pozitivu ida ne’e kontaktu-besik ho kazu husi cluster balun iha Comoro. Kazu pozitivu 1, hela iha Aldeia Gideon, Suku Vila-Verde, Postu Administrativu Vera-Cruz, pozitivu ida ne’e kontaktu-besik ho kazu husi cluster HNGV.
Ho nune’e, kazu detetadu ka pozitivu iha Munisipiu Dili husi loron 7 Marsu 2021, to’o ohin 20 Marsu de 2021, hamutuk 136.
Dadus jeral ba loron 20 Marsu nian mak kazu foun total 19, kazu rekuperadu nain 3 no kazu ativu 154. Hosi kazu nain 19 ohin, iha mane nain 6, feto nain 13. ema ho idade tinan 13 nain ida, ema ho idade entre tinan 16-79 nain 18, ema sintomátiku nain 3, ema asintomátiku nain 16. Hosi horiseik mai ohin ne’ebe halo teste PCR hamutuk 628.
