Reportazen David da Costa Gusmao*
Sekretariu Estadu Prostesaun Sivil (SEPS) fasilita hosi Diresaun Nasional Prevensaun Kompletu (DNPK) no Plan Internasionál Timor-Leste (PITL), ohin re-integra komunidade afetadu dezastre natural hamutuk uma kain 38, no ema hamutuk 185 iha centro evakuasaun rezidensia Padre, Konventu Canosiana Hera, iha Aldeia Ailok Laran, Suku Hera no Postu Administrativu Cristu Rei fila ba sira ida-idak nia hela fatin.
Diretor Jeral Protesaun Civil (DJPS), Ismael da Costa Babo dehan informasaun ne’ebe sira rona husi Amo katak iha komunidade ne’ebe afetadu inundasaun hamutuk uma kain 70 resin, mak hela iha centru Canosiana Hera, ohin re-integra fali ona familia uma kain hamutuk 38 ba iha nia hela fatin.
“Ohin ita re-integra fali komunidade ne’ebe afetadu hosi inundasaum hamutuk uma kain 38 ba iha nia hela fatin, no fasilita hosi DNPK no PITL. Ida ne’ebe uma sira aat hotu, Amo sira sei akomula iha fatin ne’e, no ita sei buka solusaun, atu sira bele fila hotu ba sira nia hela fatin“, esplika Ismael ba jornalista sira, iha centro Canosiana Hera, 23/04.
Nune’e Diretor Jeral Protesaun Sivil agradese ba Amo, tanba bele asegura hela komunidade sira ne’ebe hetan afetadu hosi inundasaun, hodi lori mai hela iha fatin ne’e.
Referendismu Padre Nivio Correia husi seminariu Sagrada Kurasaun de Jesus, ne’ebe mak fasilita vitima dezastre natural hateten komunidade ne’ebe afetadu ba inundasaun, iha loron 4 Abril hamutuk uma kain 72, no ema hamutuk 585 mak mai hela iha centro Canosiana Hera.
“Iha ami nia fatin sagrada Kurasaun de Jesus Hera, ami akomula hamutuk uma kain 72, no ema hamutuk 585, sira mai husi bairo rua mak Kampu Baru no Bedik. Loron primeru seminariu sagrada kurasaun de Jesus mak tein hahan fo ba sira, maibe agora ne’e apoiu husi parte governu, organizasaun balun no familia balun mak ajuda ona, ne’ebe hau senti kmaan ona”, informa nia
Nia esplika ohin komunidade hamutuk uma kain 38, no ema hamutuk 185 populasaun mak fila ona ba sira nia hela fatin, no ida ne’ebe seidauk ba ne’e hamutuk uma kain 40 ital, no ema hamutuk 300 resin mak sei hela iha ne’e tanba sira nia uma garave tebes.
Iha fatin hanesan Casilda Guterres komunidade ida ne’ebe afetadu husi inundasaun espresa nia sentimentu katak, senti triste los, tanba mota lori hotu sira nia sasan iha uma laran, no halo sira mai hela hotu iha fatin ida ne’e. Ida ne’e igreja labele hela metin iha ne’e, maske uma aat maibe sei fila ba uma atu bele hadia.
“Hau sente triste los, bainhira udan tun estraga hotu ami nia hela fatin no sasan uma laran, no ami evakua tiha mai iha fatin ne’e, maibe grasa de deus ohin ami bele fila ona ba ami nia uma, maske uma aat ona, maibe ida ne’e mak ami nia uma, ne’ebe ami sei hadia atu nune’e ami bele hela fali,” nia dehan.
*(David da Costa Gusmao nudar estudante UNTL ne’ebe halo estajiu iha Neon Metin)
