Reportajen David da Costa Gusmao
Relasiona ho planu Programa Expo Dubai, liu hosi konferénsia imprensa Juventude Fretilín rejeita total ba expo Dubai 2020 ne’e, no husu ba governu atu kria kampu serbisu ba joven sira hodi redús membru dezempregu iha Timor-Leste.
Porta voz Juventude Fretilín, Jeferino da Silva deklara sente triste ho deklarasaun Primeiru Ministru VIII Governu Konstitusionál, bainhira afirma katak governu nia pozisaun ba Partisipasaun Timor-Leste nian iha expo Dubai 2020, kontinua iha tempu pandemia COVID-19, maibé iha rai laran COVID-19 sai hanesan bareira.
“Ami juventude Fretilín kontinua rejeita nafatin programa expo Dubai iha post COVID-19 no husu governu atu konsentra de’it ba programa governu no planu rekuperasaun ekonómika, hodi hatán ba problema sosiál no ekonomia ne’ebé povu maubere hasoru hela, ho nune’e bele ajuda rezolve hikas bainhira ita tama ba era normal”, dehan Porta voz Juventude Fretilin, Jeferino liu husi koferensia impremsa iha sede Komité Sentrál da Fretilín Comoro, Segunda 14/06.
Nia haktuir partisipasaun Timor-Leste ni’an iha expo Dubai 2020, ne’e hanesan ba gasta de’it povu nia osan maibé povu barak mak sei ki’ak , mal nutrisaun aumenta no bee mós laiha.
“Ami mós konxiente katak ita presiza duni atu halo relasaun diplomátika ho nasaun hotu iha mundu , hanesan ita nia Konstituisaun Repúblika loke dalan ba ita maibé labele lori expo Dubai 2020 hanesan programa primadona”, nia dehan.
Nia salienta Juventude Fretilin Rejeita Expo Dubai 2020 no Juventude Fretilín husu governu hodi kria kampu serbisu ba joven sira, hodi redús númeru dezempregu.
“Ami Juventude Fretilín kontinua fó konfiansa tomak ba Primeiru Ministru VIII Governu Konstitusionál Jenerál Taur Matan Ruak maibé Juventude Fretilín mós rejeita nafatin programa expo Dubai 2020,” nia dehan.
