Reportajen David da Costa Gusmao
Prezidente Autoridade Munisipiu Dili, Gaspar Soares informa katak populasaun iha Munisipiu Dili hamutuk ema na’in 62,725 mak seidauk simu vasina, maibé autoridade Munisípiu prontu apoiu serbisu Saude nian hodi halo vasinasaun ba komunidade sira iha Dili.
Nia dehan avalisaun ne’ebe ohin halo ne’e hanesan dezafiu sira ne’ebe mak durante ne’e munisipiu Dili infrenta, no oinsa atu funu hasoru surtu Covid-19 iha Munisipiu Dili. Esforsau hotu hahu hosi Nasional to’o iha aldeia, iha momentu ida ne’e dadus hatudu katak Timor seidauk tama iha situasaun ida ne’ebe mak luz verde.
“Tuir dadus katak ema pozitivu 200 resin no obitu na’in 5, dadus hirak ne’e hatudu mai ita oinsa ita hatu esforsu liu ita nia-an. Ita sira ne’e liña frente, oinsa atu hamutuk halo prevensaun hasoru surtu Covid-19, dadaun ita mos hasoru hela variante Delta ne’ebe mak afeita hela iha munisipiu Ermera no ita hatene katak Dili mos hetan virus ne’e”, Prezidente Autoridade Munisipiu Dili Gaspar Soares esplika, bainhira partisipa enkontru avalisaun Vasinasaun Covid-19 iha Novo Turizmu Lecidere, Kuarta 18/08.
Nia dehan kazu pozitivu iha Dili kontinua aumenta, nune’e autoridade Munisipiu Dili kontinua serbisu hamutuk ho Saude atu halo vasinasaun ba komunidade sira. Tuir dadus munisipiu Dili katak sei halo vasina ba ema na’in 1800 iha loron ida, ida ne’e mak tarjeitu autoridade no serbisu saude munisipiu nian.
“Ita nia populasaun iha Dili seidauk halo vasinasaun hamutuk ema na’in 62,725 no populasaun ne’ebe simu ona vasina hamutuk ema na’in 151,075, iha Dili ita tama ona 70% simu vasina ona, maibe numeru ida ne’ebe mak ohin seidauk vasina, ne’e ita hotu nia esforsu tomak hodi serbisu hamutuk atu garantia ba ita nia komunidade sira,” nia haktuir
Reprezentante Organizasaun Mundial Saúde (OMS) iha Timor-Leste, Arvind Marhur hateten iha Munisípiu Dili ema simu vasinasaun primeiru dozes atinje ona 70% no ba dozes daruak atinje ona 45%.
