Home Notisia Fundador RENETIL Agapito “Mau-Loco” Hakoi Iha Jardim Heroi Metinaro

Fundador RENETIL Agapito “Mau-Loco” Hakoi Iha Jardim Heroi Metinaro

528
0

Reportazen Santina Lucia da Costa

Prezidente Repúblika, Dr. Francisco Guterres Lú Olo,  iha 17 Agostu 2021, liuhusi Dekretu Prezidente Repúblika dekreta Estadu fó onras fúnebre no hakoi Agapito Cardoso “Mau-Loco”  iha Jardim dos Herois da Pátria Díli nian, iha Metinaro.

Tuir komunikadu imprensa ne’ebé Neon Metin asesu katak, liuhusi Dekretu Prezidente Repúblika ne’ebé publika iha Jornal da República hateten Konstituisaun konsagra rekoñesimentu no valorizasaun ba rezisténsia secular Povu Maubere kontra dominasaun estranjeira no kontributu ema hotu-hotu ne’ebé luta ba independénsia nasionál.

Lei kona-ba Estatutu Kombatentes Libertasaun Nasionál reafirma vontade atu fó omenaje ba esforsu sira ne’ebé manifesta husi Kombatentes Libertasaun Nasionál iha luta ba Independénsia Nasionál.

“Haree ba kontribuisaun ba Luta Libertasaun Pátria, Comissão de Homenagem, Supervisão de Registos de Recursos autoriza Agapito Cardoso “Mau-Loco’O”  iha direitu atu hetan onras fúnebre no hakoi iha “Jardim dos Herois da Pátria Díli nian iha Metinaro nu’udar Kombatentes LIbertasaun Nasionál.” Esplika iha komunikadu imprensa 18/08.

Agapito Cardoso, moris iha Rotutu, iha 4 Abril 1967, oan husi Joaquim Cardoso no Berta Seixas. 

Iha tinan-1975 sai membru Organizasaun Popular Juventude Timor iha Manufahi no halai ba ai-laran hodi reziste hasoru okupasaun Indonézia.  Iha 1981 tan ninia partisipasaun iha Levantamentu iha Rotutu, militár Indonézia kaptura saudozu no destera família saudozu nian ba Betanu durante tinan-hitu.

Bainhira kontinua nia estudu iha ensinu superior iha Bali, saudozu envolve ativa iha movimentu klandestina ho hamutuk ho Timoroan na’in-sia sira seluk harii RENETIL, iha 20 juñu 1988.

Iha 1989, Mau-Loco hamutuk ho Marciano Garcia da Silva, João Reis no Avelino Coelho tama embaixada Vatikanu ho objetivu atu internasionaliza kauza Timor-Leste ninian. Hafoin Masakre Santa Cruz, iha 19 novembru 1991, saudozu partisipa iha manifestasaun pasífika iha Jakarta hodi protesta atrosidade ne’ebé militár Indonézia komete. Ho nia partisipasaun iha manifestasaun pasífika hamutuk ho estudantes timoroan sira seluk, nia hetan pena, halo nia lakon nia bolsa estudu husi Governu Indonézia.  Fila mai Timor-Leste kontinua estudu iha Universitas Timor-Timur (UNTIM) no bainhira harii Dewan Solidaritas Mahasiswa Pemuda dan Pelajar Timor-Timur (DSMPPT) saudozu hetan responsabilidade nu’udar Koordenadór Dewan Mini Manufahi.

Mau-Loco husik mundu iha 15 Agostu 2021 tanba moras rins ne’ebé nia sofre desde 2016 no Covid-19.

Print Friendly, PDF & Email

LEAVE A REPLY

Please enter your comment!
Please enter your name here