Reportajen David da Costa Gusmao
Relasiona ho Konfinamentu obrigatóriu iha Dili, governu liu husi Komisaun Inter-Ministerial ba Implementasaun Vasinasaun COVID-19 nian nia sei suspende atividade vasinasaun iha kapital Dili, durante semana ida, hahú husi 27 Agostu to’o loron 2 Setembru
Porta voz Komisaun Inter-Ministerial ba Implementasaun Vasinasaun COVID-19 nian iha Timor-Leste, Dra. Maria Santina de Jesus Gomes hateten atividade vasinasaun iha munisipiu Dili sei suspende ba semana ida, hahu hosi 27 Agostu no to’o 2 Setembru, maibé ba munisípiu sira seluk ne’ebe mak laiha komfinamentu obrigatoriu vasina kontinua la’o nafatin.
“Durante semana ida ne’e nia laran ita labele halo atividade vasinasaun iha Dili, tanba Dili iha Konfinamentu Obrigatóriu (KO), automátikamente pesoál saúde labele sai ba fatin ne’ebe mak afetadu no halo kampaña vasinasaun no halo vasina ba ema,” dehan Porta Voz Dra. Maria, Iha Salaun MSSI Kaikoli, Kinta 26/08.
Nia haktuir iha semana ida ne’e mak númeru kazu ne’e tun fali, vasinasaun ne’e bele kontinua la’o fali, maibé semana ida ne’e mak númeru kazu kontinua sa’e entaun sei suspende nafatin atividade vasinasaun ne’e.
Entretantu dadus jeral ba COVID-19 ohin loron 26 Agostu tinan ne’e, hosi Sala Situasaun Centru Integradu Jestaun Krize (SS-CIJK) rejista kazu foun 307, iha Dili 243, Baucau 30 no Munisipiu Seluk 34, kazu rekuperadu 152, kazu ativu baixa iha izolamentu 4,203, kazu óbitu ohin nain 4 no total óbitu hamutuk 56, total kazu konfirmadu kumulativu sura husi 21 Marsu 2020 to’o mai ohin loron 26 Agostu hamutuk 15,603.
