Reportajen Zevonia Vieira
Ministeriu Saude (MS) rejista kazu obitu ka mate ho COVID-19 ba loron 4 Setembru hamutuk nain 4. Liuhusi komunikadu imprensa Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste (SIJK), Dr Rui Maria de Araújo relata ba jornalista sira katak MS rejista kazu obitu nain 4 ho nia detalle tuir mai katak bebé feto idade loron 12 timoroan, inan hela iha Remexiu, seidauk vasina, iha 23 Agostu 2021, moris husi inan diagnóstikadu ho Covid-19.
Matebian sofre mós sífilis congenital, hafoin moris hetan pneumonia tanba Covid-19, hala’o tratamentu iha semana ida ikus, maibé iis-kotu ohin 12:20.
Kazu obitu seluk mane, idade tinan 76 timoroan hela iha Dili, seidauk vasina, iha 23 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tan bá Covid-19. Iha loron ne’e kedas matebian hala’o tratamento iha Vera Cruz. Matebian iis-kotu ohin 14:55 iha Vera Cruz.
Iha tan mane idade tinan 42 timoroan, hela iha Lospalos, seidauk vasina, iha 3 Setembru 2021 diagnóstikadu iha Lospalos ho sindroma insufisiénsia respiratória aguda (SIRA) tan bá Covid-19. Matebian i’is-kotu ohin dader oras 05:35, iha Lospalos.
Ikus liu mane idade tinan 16 timoroan, hela iha Lospalos, seidauk vasina, iha 3 Setembru 2021 diagnóstikadu iha Lospalos ho sindroma insufisiénsia respiratória aguda (SIRA) tanbá Covid-19. Matebian sofre mós moras fuan ho anemia. Matebian iis-kotu horiseik 18:00, iha Lospalos.
Nune’e dadus jerál hatudu katak kazu foun hamutuk nin 89 (Dili 39, Covalima 22, Lautem 11, Baucau 8 & munisipiu seluk hamutuk 9), kazu rekuperadu ne’ebé relata ohin iha nain 253. Total kazu ativu ohin iha nain 4.261, total kazu konfirmadu kumulativu sura husi loron 21 Marsu 2020 to’o ohin loron hamutuk 17.468, total óbitu ohin nain 4 nune’e kazu obitu sae ba 78
