Home Justisa Serka Sanitaria, JSMP: Difikulta Vitima VBJ Asesu Asistensia no Tribunal

Serka Sanitaria, JSMP: Difikulta Vitima VBJ Asesu Asistensia no Tribunal

226
0
Diretora Executiva JSMP, Ana Paula Marcal. [Foto: Francisco JDA | 19.06.2020]

Reportazen Zevonia Vieira

Iha situasaun serka sanitária no konfinamentu obrigatóriu husi governu, hodi limita movimentu ka sirkulasaun ba atividade sira, JSMP nafatin fó asisténsia limitadu ba vítima sira violénsia bazeia ba jéneru (VBJ)

Liu hosi komunikadu imprensa ne’ebe Neon Metin asesu, JSMP relata katak hosi asisténsia limitadu durante situasaun implementasaun serka sanitária no konfinamentu obrigatóriu ne’e, JSMP deskobre katak kazu barak mak akontese liu-liu kazu violénsia bazeia ba jéneru.

Diretora JSMP, Ana Paula Marçal hateten hanesan iha Munisípiu Ermera (Gleno) vítima sira violénsia bezeia ba jéneru kontinua lori sira nia kazu ba keixa iha Polísia-VPU Ermera maibé Polísia sira rejista deit kazu ne’e no haruka vítima sira filafali ba uma no la refere ba fatin sira ne’ebé vítima sira presiza apoiu tuir sira nia kondisaun hanesan ba iha Pradet ka Uma Mahon tanba kumpre regra aplikasaun serka sanitária no konfinamentu obrigatóriu.

“JSMP konsidera katak importante tebes atu asegura direitu vítima violénsia bazeia ba jéneru liu-liu ba kazu sira hanesan violasaun seksuál, abuzu seksuál aktu seksuál ho adolexente no violénsia doméstika ne’ebé rekere prova ka evidénsia sira inklui asegura vítima sira nia direitu hodi hetan protesaun no seguransa, nune’e JSMP husu ba instituisaun relevante sira atu buka solusaun alternativa hodi hatan ba situasaun refere”, dehan Ana Paula Marçal, 17/03

Nia dehan mezmu iha situasaun serka sanitária no konfinamentu obrigatóriu, maibé Lei Nú. 2/2021, 01 Marsu, kona-ba Autorizaçao da Renovação da Declaração do Estado de Emergência iha artigu 8 kona-ba asesu ba tribunál no mós Provedoria Direitus Umanus no Justisa[1] ne’ebé hateten katak iha situasaun serka sanitária no konfinamentu obrigatóriu instituisaun sira hanesan tribunál, ministériu públiku dan Provedoria Direitu Umanu no Justisa nafatin hala’o sira nia funsaun. Tanba ne’e tuir JSMP nia hanoin kazu sira hanesan ne’e presiza kontinua fó prioridade maske nafatin kumpre regras serka sanitária no konfinamentu obrigatóriu.

Situasaun sira ne’ebé mensiona iha leten, JSMP hanoin no prezume katak bele mós akontese iha munisípiu sira seluk, tanba ne’e JSMP husu ba instituisaun relevante sira atu buka solusaun imediata hodi responde ba preokupasaun sira husi vítima violénsia bazeia ba jeneru ne’ebé durante implementasaun serka sanitária no konfinamentu obrigatóriu hasoru problema atu asesu ba serbisu asisténsia no asesu ba tribunál.


Print Friendly, PDF & Email

LEAVE A REPLY

Please enter your comment!
Please enter your name here