Home Memoria Hanoin Hikas Fundador Arte Moris, Luca Gansser, Inspirador

Hanoin Hikas Fundador Arte Moris, Luca Gansser, Inspirador

84
0
Foto: WordPress.com

Luca Gansser moris iha loron 27 fulan agostu, tinan 1945, iha Bogotá, Colombia, oan datoluk husi maun-alin na’in 6.  Nia Pai mak Augusto Gansser, geolojista Suissa famozu ida, no nia inan mak Toti Biaggi. Família ne’e hela iha nasaun barak bainhira Luca sei ki’ik: Colómbia, Trinidad, Persia, no Suissa.  Luca hanesan artista auto-didact ( katak aprende mesak, lahó eskola ka mestre ruma) ne’ebé foka liu ba pinta. Karik tanba nia muda no lemo-ra’i barak bainhira nia sei ki’ik, nia sai artista modernu bohemian ida.  Ninia Experiénsia sira iha fatin barak sai inspirasaun no influénisa ba nia prátika. Porezemplu bainhira nia vizita nasaun Bhutan, nia estuda téknika pinta Thangka, no depois nia uza téknika ne’e iha nia arte.  Sally-Ann Grey mak Kritikadóra arte-vizuál iha Sydney no iha tinan 1993 nia hakerek katak, “Luca Gansser hanesan nomad (ema lemora’i-dor) modernu. Pintura hirak ne’e hanesan fatin atu rai tezouru husi nia experiénsia globál. Iha sira-nia aspetu realistiku, sira hanesan reportajen husi ema etnólogu ne’ebé estuda pedasuk sira husi kultura oioin; iha sira-nia aspetu fantástiu, sira hanesan janela imajinasaun nian.”

Durante tinan balu iha 1970s nia laran, Luca moris iha Méksiko, no prodúz nia exposizisaun primeiru iha ne’ebá. Nia oan mane Sambo moris iha tinan 1974. Lakleur, Luca mesak mak hakiak no tau matan ba labarik ne’e. Iha tinan 1980 bainhira Luca vizita Guatemala, nia hasoru malu ho Gabi (Gabriella), no sira kaben iha tinan 1987. Iha tinan 1982 Luca mai hela fali iha nia família nia uma iha Lugano, Suissa, no Sambo estuda iha eskola Steiner. Hodi selu eskola, Luca serbisu iha eskola ne’e nudár badain halo dezeñu ba palco hodi uza ba teatru.

Luca no Gabi lemo-rai no kolabora ho artista lokál balu iha Moscow no África do sul. Sira organiza no partisipa iha expozisaun multikulturál sira ne’ebé inklui artista husi Suissa, Russia, no África.  Sira fahe ideas ba malu, no kolabora iha estudio sira. Husi projeitu barak, ida mak workshops ho artista sira husi Funda Art Center, Soweto, África do sul, no kolaborasaun ho hakerek-na’in teatru ida naran Matsemela Manaka.  Ho nia sira kria dezeñu set ba pesa teatru Goree, the Island of Slavery (Goree, Ilha dadur).  Luca ajuda artista katuas ida husi Ukrainia, Vicheslav Tokarev, hodi halo expozisaun rua iha Lugano.  Iha époka ne’e, Luca bá Austrália sentrál no Kakadu hodi estuda arte Aborijeni nian. Iha tinan 1990s,  Komeza vizita dala barak ba Ásia sur-este no Austrália. Iha Thailandia nia hasoru Dr. Jacques Ivanoff (etnólugu husi Fransa).

Nia hasoru mos Moken sira, ne’ebé moris iha ró de’it, moris bá-mai iha tasi iha área Thailand / Myanmar/ Burma. Iha livru sira Moken Boat, Symbolic Technology no A journey in the Mergui Archipelago Luca halo ilustrasaun sira.  Luca mos hanesan fundadór ba Mergui Archipelago Project mak estuda no halo  peskiza kona-ba Moken sira no sira-nia ambiente.  Pintura sira ne’ebé  Luca halo durante tempu ne’e inklui iha expozisaun iha Sydney, Austrália. Luca kontinua serbisu iha Thailandia parte sul husi 1996 to’o 2002, no vizita no halo expozisaun dala barak iha Indonésia no Singapura.

Iha fulan Juñu, tinan 2002 Luca no Gabi sama rai Timór pela primeira vez. Fila mai husi expozisaun di’ak ida iha Zurich, Suissa, sira kaer hela osan uitoan hodi loke eskola arte ida: Arte Moris, no sira kontinua sai fornesdór prinsipál  ba fundus ne’ebé suporta eskola ne’e.

Sira hela ho artista joven barak to’o tinan 2010, hanesan família boot ida: Luca mak hanesan sira nia mestre, mentor, no inspirdór.  Fasil atu nota Luca nia influénsia nu’udar artista ba pintura primeiru sira husi jerasaun artista Timor-oan sira-ne’e. Maibé ho ninia metode hanorin, lakleur sira dezenvolve tiha sira-nia estilu rasik.  Nu’udar kolektivu, Arte Moris halo expozisaun barak iha Timor-Leste, no Arte Moris mak fó dalan ba arte kontemporáneu Timor-leste nian atu sai ba rai li’ur, liuhusi expozisaun ne’ebé halo iha Europa, Austrália, no Ásia sul-este. Bele dehan katak Arte Moris sai hanesan Timor-leste nia ambaixadór kulturál ida.  Iha Timor-leste, Arte Moris halo eventu no projetiu barak iha munisípiu sira, hanesan workshops ba artista labarik tinan kiik iha áreas remotas.

Durante Krizi 2006/7 Arte Moris simu IDPs barak, no komunidade Arte Moris hare’e sira di’ak, maske IDP sira barak hela kle’ur liu no ida-ne’e dalaruma kria situasaun difisil ba Arte Moris no ba Luca no Gabi.

Luca mos gosta múzika, liuliu jazz. Nia toka flauta no saxophone no gosta liu mak improvizasaun. Dala barak, iha sesaun-toka-livre (jam session) toka hamutuk ho ema oioin iha komunidade Arte Moris. Kolega ida husi Alemaña, Harald, fó tambór djembe barak.  Kalan fulan naroman, ne’ebé sempre nakonu ho múzika, sai legendário. Dala ruma kalan sira ne’e kontinua iha tasi ibun, no ema ne’ebé asisti tempu hirak ne’e sei la haluha. To’o nia mate Luca mantein nia entuziasmu ba múzika, toka hela ho múziku sira iha nia uma ikus.

Maski dalaruma Luca ulun to’os, aspetu ne’e lakon kuandu kompara ho nia laran di’ak ba ema seluk. Nia ajuda artista sira seluk, liuliu sira ne’ebé mai husi rai ne’ebé sofre opresaun no pobreza.  No mos nia sempre prontu atu ajuda ninia família.  Nia ajuda nia pai tau matan ba nia mae bainhia mae sofre moras Alzheimers.  Nia sai husi Timór iha 2010 atu tau matan ba nia aman ne’ebé idade liu ona no mate iha 2012 ho tinan 101.  Tanba kondisaun saude la permite, Luca no Gabi la bele fila ba Timór. Entaun sira hola tiha uma tuan iha foho besik Viterbo, Itália.

Luca no Gabi hanoin barak ba rai doben Timór, maibé fatin sira hela, iha Itália nia área rurál ida,

fó kalma no komunidade di’ak ba sira atu moris durante Luca nia tinan ikus liu sira. Uma iha Itália kria ambiente hanesan ho Arte Moris. Alegria boot ba sira bainhira sira hetan vizita husi kolega sira ne’ebé koñese malu iha Timór.  Kapaas liu mak vizita husi estudante sira hanesan Alfeo Sanches Pereira iha 2017, no Tony Amaral, Cesário Lourdes, no Etson Caminha iha Dezembru 2018. Sira ikus monta exhibisaun no konsertu ho múziku lokál balu. Ho han-kalan hamutuk barak, sesaun múzika improvizadu barak,  semana ne’e sei moris nafatin iha memória husi ema hotu ne’ebé hola parte.

Komunidade Arte Moris tomak hanoin duni sira nia Papa Pinta, Luca, no hafolin legadu ka eransa ne’ebé Luca rai ba sira ida-idak nuudar artista individuál.

Luca nia moris nakonu ho kriatividade, cariñu, no umanidade. Nia halo influensia di’ak iha fatin-fatin ne’ebé nia bá. Nia mate ho kalma iha uma iha loron 22 juñu.

(Foti hosi ETAN Mailing List, Ros Dunlop)

LEAVE A REPLY

Please enter your comment!
Please enter your name here