Home EduTek Berliku Fanu Rai (BRF) Organiza Workshop ba Dezenvolvimentu Muzika

Berliku Fanu Rai (BRF) Organiza Workshop ba Dezenvolvimentu Muzika

256
0

Adroaldo ‘Saretukau’ & Lucas ‘Hagho’

BFR organiza workshop hodi koalia kona ba dezenvolvimentu musika liu hosi industria kreativa. Intensaun hosi workshop ne’e atu tau hanoin hamutuk oinsa halo muzika bele sai hanesan kareira profisional tanba to’o agora muzika seidauk bele fo han ema sira ne’ebe hakna’ar iha área ne’e.

Diretur BFR, Kiera Zen (Eduardo Soares), nudar organizador ba workshop ida ne’e hatete katak intensaun lori matenek nain muzika ho experiensia bot, Tjut Nyak Deviana Daudsjah, hosi Indonesia mai fo workshop ba muzikus sira iha Timor-Leste hodi fahe hanoin kona ba dezenvolvimentu muzika nudar industria kreativu ida.

“Objetivu hosi workshop ida ne’e maka halo diskusaun oinsá múziku sira bele halo múzika ne’e sai kareira hanesan profisinal, tanba ita haree to’o agora múzika seidauk fo moris ba múziku sira. Tanba ne’e lori ema ida iha experiensia hosi Indonesia, Sra. Tjut Nyak Deviana Daudsjah, mai fahe ninia experiensia. Ita bolu mai atu oinsá maka ita bele estabelese ita nia indústria múzika. Indústria múzika ida ohin loron tama ona ba digital, ita la fa’an ona CD maske sei fa’an maibé ladun ona. Liu hosi ida ne’e mak lori ita ba indústria múzika. Tanba wainhira nia hakarak atu fa’an múzika Online, liu hosi gravasaun, antes gravasaun sei iha banda creativa.”Diretur Kiera hatete lia hirak ne’e iha fatin workshop, horiseik iha SEJD (31/07).

Diretur Kiera mos hatutan dehan Indústria múzika ida ohin loron tama ona ba digital, ita la fa’an ona CD, maske sei fa’an maibé ladun ona. Liu hosi ida ne’e mak lori ita ba indústria múzika. Tanba wainhira nia hakarak atu fa’an múzika Online, liu hosi gravasaun, antes gravasaun sei iha banda creativa. Esperiénsia barak iha múzika maibé folin la iha. Sira hakarak múziku hotu hanoin hamutuk oinsá ita bele hasa’e folin múzika nian, atu nune’e bele sai kareira profisional ba múziku sira. BFR rasik hala’o ona kursu orkestra ba joven no koko atu lori múzika tradisional, Timor nia kor ba rai li’ur. Nia mos dehan tan katak ita hakarak lori ba rai li’ur ita tenki halo buat ne’ebé ema hakarak sosa, tan ne’e BFR hakarak estuda múzika ho meiu formal hetan S1 iha múzika. Depois sira bele dezenvolve itania múzika lori ba rai li’ur, tanba se ita la iha formasaun iha múzika ita labele halo buat ida.

Tjut Nyak Deviana Daudsjah nudar orador uniku ba workshop ne’e hateten katak, “Iha persepsaun, pensamentu hanesan mós ho BFR mak ho ksolok tulun dezenvolve edukasaun no indústria sai ekosistema múzika ka pakote ida. Saída mak ita bele fa’an iha indústri múzika, en termu de étnika múzika Timor-Leste, tanba múzika pop ita rona iha mundu internasional repete ba bei-beik. Só kapasidade ne’ebé Timor-Leste iha atu fa’an. Tanba ko’alia konaba múzika dijital, tempu agora ema ladun sosa CD, tanba maioria downloadno sira prefere se bele gratuita.”

Iha workshop ida ne’e Tjut Nyak Deviana Daudsjah konta ui-tuan momentu niaiha Europa, nia organiza konsertu, sai mós hanesan Diretor Teatru Nasional múzika iha Suésia durante tinan 10 no halo formasaun ba teatru no mos ba no kantador sira. Tanba saída maka nia fila mai iha Indonezia, tanba nia preokupa ho indústria múzika iha Indonézia. Nia haree katak dezenvolvimentu muzika ne’ebé la’o iha fatin de’it ka muda-an ba kotuk. Buat ne’ebé halo nia tau atensaun mak plajiiarismu. Ema barak tebes mak kópia múzika hosi rai liur no hakerek fila-fali ho lian Indonézia hodi  halo fali sira nian rasik. Múzika Indonézia barak tebes ne’ebé kopia múzika pop internasional. Ida ne’e maka pontu prinsipal Sra. Deviana nian atu konsensializa joven sira atu labele kópia ema ni-nia múzika no depois hatete katak ne’e sira nian rasik, diak liu orijinalno labele kópia.

Tjut Nyak Deviana Daudsjah mos hatete, “ita bele hananu genre oi-oin konforme ita nia hakarak. O la’os US, maibé O Timor-Leste no ha’u Indonézia. Só apresia ba ho ita nia kultura rasik. Uza tékniku modernu nian, maibé dezenvolve liu ba múzika étniku ita nian, ka ho talentu ba múzika orijinal ita nian. Tanba múzika popular hananu iha kompetisaun ne’ebé deit hanesan iha Malaysia no fatin seluk tan Ida ne’e la reprezenta o nia nasaun, Ida ne’e la reprezenta o nia aan, o só kópia buat ne’ebé orijinal.”

Ema ne’ebé mak Tjut Nyak Deviana Daudsjah rasik hanorin no estuda hamutuk ho nia maka hanesan Krisdayanti, Yuni Sarah, The Gruf, Agnes Monica, Banda Nidji no sel-seluk tan.

Marka mós prejensa iha workshop ida ne’e, Prezidente ALMAMOR, Erik Rosario Way Watu. Nia ho esperansa hato’o katak, “ba oin governu liu-liu SEJD bele suporta mós grupu múzika sira seluk, la’os de’it BFR. Almamor hakbesik dau-dauk ba grupu balun, oinsá para governu suporta tan sira. Prezidente Almamor mós agradese ba prejensa Sra. Devinana, nia mós tatutan tan katak se bele baoin iha servisu di’ak liu tan atu nune’e bele hala’o workshop ida ne’e ho durasaun tempu ne’ebé naruk oi-tuan ho tópiku ne’ebé atraente liu tan. Nune’e bele halibur artista no grupu banda sira iha Timor-Leste.”

Workshop ida ne’e organiza liu hosi servisu hamutuk entre Berliku Fanu Rai, Sekretariadu Estadu Juventude no Desportu (SEJD) no Almamor. Workshop ne’e partisipa hosi muzikus sira no mos iha aprezentasaun muzika.

 

 

LEAVE A REPLY

Please enter your comment!
Please enter your name here