Home Meio Ambiente Dezastre Tasi Sa’e Iha Atabae, Jaimitu Mate, Facebook Like Barak

Dezastre Tasi Sa’e Iha Atabae, Jaimitu Mate, Facebook Like Barak

367
0
foto: Surftravel Australia

Jhon ‘Lelobere’ & Ato ‘Lekinawa’

Sosiedade Timor-Leste ninia konsiensia kona ba efeitu hosi dezastre naturais menus tebes. Dezastre ida akontese iha loron 2 liuba, iha Atabae, halo mate Jaimitu, tinan 7, maibe iha media sosial Facebook ema barak mak fo sinal like (gosta)100 resin ba situasaun ne’e, no governo ba hafoin akontesementu.

Komunidade Atabae la hetan informasaun ruma hosi autoridade local kona ba saida mak sei akontese ba sira nia suco, Suco Atabae, iha loron ne’e (30/07). Derepenti anin bot no tasi nia galumba baku maka’as sae ba suco laran. Jaimitu ho idade kik la preparadu hasoru situasaun ne’e. Galumba bot tasi nian baku derepenti no lori kedas nia.

“Jaimitu ho ninia kolega nain 2 halai ba tasi ninin tanba hakarak haree tasi. Bainhira to’o iha tasi ninin, lakleur deit laloran bot mai, Jaimitu nia kolega nain rua halai fila uluk kedas, maibe Jaimitu la konsege bot an lalais. Galumba tasi baku no dada tama Jaimitu ba tasi tasi laran.” Primu hosi Jaimitu (matebian), Quelmentino Soares, konta tuir hikas situasaun ne’e via telefone ba Jornalista Neon Metin iha Dili.

Quelmentino mos hatete katak labarik iha ho tinan 10 mak konsege mak konsege lori sai Jaimitu nia isin. Maibe Jaimitu iis kotu tiha ona. Jaimitu nia aman, Florindo Bulimau, nia inan Maria Celestina, siente triste tebes ho insidente ne’e. Sira lakon tiha oan mane diak ida, mak eskola hela iha eskola primaria. Administrador Atabae, Jose Goncalves da Silva mos konfirma Jaimitu nia mate ho istoria mak hanesan Quelmentino konta ona.

Liu hosi intervista via telefone mak halo ho Administrador Jose, nia mos konta katak iha kalan fali (30/07) komunidade sira derepenti panik no lalin sasan sae ba hotu foho, no ailaran. Sira muda derepenti tanba rona sinu igreja lian no sira hanoin igreja fo sinal kona ba tasi sae.

Administrador mos informa katak Ekipa hosi Ministeriu Solidaridade Sosial no mos Administrador Munisipiu to’o ona ba fatin akontesementu hodi tau matan. Sira identifika mos uma kain 6 mak bele hetan ameasa bainhira dezastre naturais akontese hikas.

Maibe diferente uituan ho reasaun sosiedade nian mak halo iha media sosial Facebook. Bainhira sira hatene katak dezastre naturais akontese, ema ida publika kedas iha Facebook, temi kona ba dezastre ne’e, no temi mos katak labarik ida mate tanba dezastre ne’e. Iha publikasaun hosi ema ida, iha tuku 5 lorokraik, iha loron hanesan ho akontesementu dezastre, hetan ema like 100 resin, uituan deit mak hatete Deskansa ho Dame, no ema nain 2 deit mak husu oinsa mak situasaun ne’e akontese. Fenomenu ida ne’e hatudu momoos sosiedade ninia konsiensia kik ba eventu mak akontese.

Hosi akontesementu ida ne’e notavel tebes katak governo la fo informasaun antes kona ba posivel dezastre mak akontese. Iha tempu hanesan komunidade sira la iha koinesemntu kona ba asaun sira mak komunidade presija halo kona ba dezastre mak akontese.

To’o notisia ne’e hatun situasaun iha lokalidade Atabae hakmatek fali ona.

 

 

 

 

 

LEAVE A REPLY

Please enter your comment!
Please enter your name here