Home Justisa FMTL: Lei Kriminaliza Defamasaun Sei Benefisia Deit Ukun Nain no Fo Liberdade...

FMTL: Lei Kriminaliza Defamasaun Sei Benefisia Deit Ukun Nain no Fo Liberdade Ba Koruptor Sira

433
0
FMTL halo konferensia imprensa. [Foto: Santina Lucia da Costa | 13.07.2020]

Reportazen Santina Lucia da Costa

Relasiona ho projetu Lei Kriminalizasaun Defamasaun ne’ebe mak Ministeriu Justisa dadaun ne’e prepara no halo alterasaun husi Lei kodigo sivil, ne’ebe mak vigora iha Timor-Leste.

Liu husi konferensia imprensa, porta-voz Front Mahasiswa Timor-leste (FMTL),Jose Lino Pereira hateten ezistensia ba esbosu Lei ida ne’e la’os atu eduka sidadaun sira, maibe FMTL haree katak, ezistensia husi esbosu Lei ida ne’e, hamate totalmente sidadaun hotu nia liberdade opiniaun ka expresaun haktuir iha artigu 40 K-RDTL no Konvensaun Internasional sira hanesan Deklarasaun Universal Direitus humanus (DUDH) sira ne’ebe ratifika nudar ita nia Lei nasional.

“Ami nota katak Ministeru Justisa, Manuel Carceres iha inisiativa boot, hodi halakon sistema demokrasia ne’ebe mak sosa ho ruin no ra’an, tanto mos ami hare’e katak Ministeriu Justisa tenta atu lori povu ida ne’e, hodi refleta fila fali ba tempu ditadura Salazar no Soeharto nian”, hateten  Jose Lino Pereira liuhusi konferensia imprensa, iha Liceu UNTL, loron, 13/7.

FMTL husu ba Manuel Carceres  atual  Ministru  Justisa  atu  hapara esbosu Lei ida ne’e. Front Mahasiswa haree katak sekuensia husi esbosu Lei ida ne’e, mak hetan aprovasaun, sei fo impaktu sira hanesan hamate prinsipiu estadu Direitu Demokratiku Timor -Leste no la komunga prinsipiu Konstituisonais no Leis. Hamate (artigo 40) Liberdade koalia no informasaun ninian, ate artigo 48 direitu petisaun ninian.

Jose Lino afirma la komunga prinsipiu jerais ne’ebe hatur iha artigu 16, koalia kona-ba Universalidade no Igualidade. Desmantela funsionamentu instituisaun estadu sira nia servisu, hanesan Komisaun Anti Korupsaun (KAK), inklui Providoria Diretu Humanus no Justisa (PDHJ) nia papel, ne’ebe hametin estadu Direitu Demokratiku no Boa Governasaun.

Hamate mos Lei Nu.5/2014 Lei Komunikasaun social, liu-liu hamate papel jornalizmu nian, ne’ebe mak hanesan povo nia lian atu bele partilha informasaun ba publiku. Hamate mos Lei Nu.1/2006 liberdade reuniaun no manifestasaun nian.

FMTL nota katak esbosu Lei ne’e mak hetan aprovasaun, sei benefisia deit ba ukun nain sira, fo liberdade ba koruptores sira no sai fatin abrigu ba kriminozu sira.

FMTL ezije ba Ministru Justisa atu labele uza poder, hodi hamate liberdade ne’ebe mak sosa ho ruin no ran. Husu mos ba Ministru Justisa atu hapara esbosu da Lei ida ne’e ho imiadiatu.

Print Friendly, PDF & Email

LEAVE A REPLY

Please enter your comment!
Please enter your name here