Reportazen Francisco JDA
“Ukun nain sira labele kria lei ka politika ou hahalok sira ne’ebe impede ema sira ne’ebe hakarak luta ba justica, demokrasia no direitus umanus. Sander Thoenes mate tinan 20 ona, governu Timor-Leste nia politika mos tenki reflete kona ba demokrasia direitus humanus nian, labele fo dalan ba politiku ida atu viola diretus ema nian no tenki deside nian an katak sei la fo fatin ba krime kontra lialos, justica no liberdade nian”, Juvinal Dias
Asosiasaun Jornalista Timor Lorosae (AJTL) vizita monumentu jornalista Olandes Sander Thoenes ne’ebe hetan oho hosi tropas Indonesia iha Becora, loron 21 Setembru 1999, tanba defende halo kobertura konaba violasaun direitus umanus ne’ebe akontese iha Timor iha tempu ne’eba.
Iha fatin refere membru AJTL no nudar programa nain ba Timor Leste Deskuti iha TVE-T, Juvinal Dias ba jornalista sira hateten Sander Thoenes reprezenta jornalista ne’ebe halo aktivismu sira koalia kona ba lialos, justica, demokrasia no direitus umanus ba Timor-Leste, sira nia mate faz parte hosi istoria tomak ba ukun rasiuk an nian, jornalista mate tanba hakarak koalia kona ba lia los no povu ne’ebe hetan rejime militar sira ne’ebe kruel.
“Sira nia mate hatudu momos katak sira ne’ebe iha poder dala barak la respeita kona ba direitus umanus, demokrasia no justisa. Sira ne’ebe iha poder hakarak hametin deit sira nia poder, liu hosi sakrifika lia los sira” hateten Juvinal, 22/09.
Nia dehan sira nia mate tenki sai hanesan lembransa ida ba ukun nain tomak, atu bele respeita valor direitus umanus, valor demokrasia nian, ukun nain sira labele uja sira nia poder atu limita liberdade espresaun sira ka liberdade imprensa no liberdade sidadaun sira, hodi bele hatete sai kona ba lia los.
“Ukun nain sira labele kria lei ka politika ou hahalok sira ne’ebe impede ema sira ne’ebe hakarak luta ba justica, demokrasia no direitus umanus. Sander Thoenes mate tinan 20 ona, governu Timor-Leste nia politika mos tenki reflete kona ba demokrasia direitus humanus nian, labele fo dalan ba politiku ida atu viola diretus ema nian no tenki deside nian an katak sei la fo fatin ba krime kontra lialos, justica no liberdade nian”, hateten Juvinal
Sorin seluk Kios ida ne’ebe harii besik monumentu Sander nian, ne’ebe tau saudozu Sander Thoenes nia naran ba nia kios, Silveiro Dato ba jornalista sira hateten, Sander Robert Thones hanesan mos heroi ba Timor, maske nia ema estranjeiro maibe defende lia los no mate iha Timor, tanba ne’e nafatin rekonnese nia sakrifisiu ne’ebe mate ba rai ne’e to’o hetan independensia.
“Agradese ba sira ne’ebe mate hodi fo an ba Timor, ita sempre fo rekonnesimentu ba nia familia ne’ebe sei moris, tanba nia familia dook, maske ema ida rua mak tau aifunan mos lori Timor nia naran,” hateten Silveiro
