Home Feature Eugenia Soi: Fila Liman Iha Merkadu Maliana, Fo Susesu ba Oan Nia...

Eugenia Soi: Fila Liman Iha Merkadu Maliana, Fo Susesu ba Oan Nia Eskola, Maibe Sira La Hetan Servisu

559
0
Eugenia Soi, Idade 57, Fila Liman iha Merkado Maliana (Foto: Marcio Morato)

Reportazen Marcio Morato Pinto

“Hau sente triste, laran susar los, bainhira hau nia oan sira remata tiha eskola maibe la hetan servisu”, Eugenia Soi expresa ba Neon Metin iha Merkado Maliana.

Ho kondisaun Ekonomia uma laran nian ne’ebe fraka, obriga Eugenia tenke husik nia uma iha loron ida tomak. Nia lao ba fila liman iha Merkadu, faan modo, bua, malus, masin, tomate no seluk tan hodi nune’e bele hetan netik osan ruma atu selu oan sira nia eskola no hola netik hahan ruma ba kabun.

Inan Feto Eugenia, ho idade 57 koko tutur naha todan hirak ne’e iha nia ulun hodi lao ba Merkadu atu fan, maske fatin ne’ebe nia atu fan dook hosi nia uma maibe nia ho pasiensia tutur ho neneik naha hirak ne’e too fatin ne’ebe nia mehi atu hetan osan ruma.

“Dalaruma lalin bee no lalin sasan sira ne’e ba Merkadu to’o halo hau nia knotak no hirus matan ne’e moras. Tutur Masin sira ne’e todan no dalaruma lori liman deit maka hit, la tula iha kareta, dalaruma hau husu ajuda ba labarik Mane oan sira ne’e dehan baino ajuda Ama lai, ama hit labele, entaun sira ajuda. Dalaruma hau hanoin hau nia oan sira ne’e dook hotu se los maka bele ajuda hau? Bainhira ema laiha hau obriga hau nia an tutur sasan sira ne’e hodi lalin deit ona” tenik Eugenia.

Bainhira too iha fatin fan nian, la hetan ema ruma atu sosa ninia sasan hanesan uluk molok COVID-19 iha. Ho pasiensia nia tur ho nonok iha tenda okos hodi hein se los maka laran luak atu sosa ninia masin, bua, malus no aifuan hirak ne’ebe iha. Pasiensia hirak ne’e nia halo tamba hakarak atu oan sira hetan susesu iha sira nia eskola liu hosi ninia kosar ben rasik. Sakrifisiu ne’ebe nia halo, ikus mai oan feto nain rua konsege remata universidade maibe to’o agora laiha ida maka hetan servisu hosi Governu.

“Hau sente triste laran susar los, bainhira hau nia oan sira remata tiha Eskola maibe la hetan deit servisu. Karik Governu tau matan, entaun Inan hau labele terus hodi tur hanesan ne’e fan sasan, hau habai loron, rai rahun, anin, fó eskola oan sira ho terus to’o halo sira  hetan tiha gelar, maibe to’o agora mos hau hanesan ne’e hela deit, hau atu halo hanusa tan? Hau ne’e preokupa liu maka oan sira nia eskola. Ami inan-aman fila liman maka selu sira nia Eskola, depois sira remata tiha eskola, servisu ida mos sira la hetan”, Eugenia haktuir

Sasan ne’ebe fan iha Merkadu Eugenia sosa tutan hosi ema seluk. Karik sasan hirak ne’e rai kleur maka sei sai at no dodok hutu no susar atu hetan funan. Problema hirak ne’e Eugenia hasoru durante COVID-19, nia la hetan osan funan tamba ema atu ba sosa ninia sasan menus.  

 Uluk seidauk COVID-19, loron ida Eugenia bele hetan U$20.00 ka U$25.00 dolares liu. Sasan sira ne’e hau hola tutan hosi ema. Entaun osan inan hau hodi sosa fila fali sasan no ida funan ne’e maka hodi hola oan sira nia presija no han hemu uma laran. Agora COVID-19 ne’e mosu halo ema laiha atu sosa Eugenia nia sasan. Entaun Eugenia atu selu oan sira nia Eskola mos osan laiha, atu sosa sasan sira presisa mos laiha. Hau pasiensia deit, hodi fan, maske loron ida tomak Eugenia hetan U$5.00 dolar, hodi tau hamutuk karik oan sira presisa Eugenia foti hodi fó ba sira.

Iha fatin ne’ebe Eugenia halo negosio ka fan sasan laiha regras atu prevene nia ho nia maluk negosiante sira seluk hosi moras pandemia COVID-19 ne’ebe Ministerio Saúde husu atu halo, se nune’e bebeik bele fó risku ba Eugenia ho nia maluk sira seluk.

“Ema balu uza maskara balu la uza. Hau mos fofoun ne’e hau uza, maibe depois hau sente la toman, sente dada is ladiak, uza luvas mos sente hanesan todan fali. Hosi Saúde fahe maskara mai ami atu uza, ema ida hetan ida, maibe uluk ema uza agora lae”, Eugenia hateten.

Eugenia laran susar hanoin nia oan sira nia Eskola ba, hanoin han hemu uma laran nian ba, hanoin lia ruma mai hosi hau nia kaben nian no hau nian. Eugenia Hanoin barak tebes, Dalaruma nia oan sira dehan Ama ami presija osan atu registo eskola ka lakleur dehan osan atu selu kost (hela fatin). Maibe Eugenia husu nia oan sira atu pariensia hodi hein. Maski nune’e Eugenia ho nia katuas oan buka osan duni hodi haruka ba oan sira.

Eugenia nia oan feto nain rua gradua iha tinan 2016, ida fali agora semester 7. Nain ida remata SMA iha tinan 2017 agora nia fan sasan tuir ema nia kareta, Oan Feto 1 no mane 1 iha SMA, ida ikun liu agora iha SMP. Ho kondisaun defisiensia iha matan sorin Eugenia hakas an nafatin hatudu ninia domin no pasiensia ba oan sira no katuas oan. La baruk atu servisu hodi buka bukahe ruma ba uma laran.

LEAVE A REPLY

Please enter your comment!
Please enter your name here