Home Notisia EBC Nú. 1 Balibo; Bee Ba Sentina La iha, Estudante Ida-Idak Lori...

EBC Nú. 1 Balibo; Bee Ba Sentina La iha, Estudante Ida-Idak Lori Bee Aqua Masa Ida Hosi Uma ba Eskola Lor-Loron

266
0
Bee ba EBC Nú. 1 Balibo La Iha (Foto: Adro Almeida)

Reportajen Adroaldo ‘Saretukau’

“Bee mos ne’ebé ami uza, ami rasik lori hosi uma mak ba eskola. Bai-bain hosi uma ba eskola minutu 30, no ami lori bee aqua boot ida kada estudante. Bee ne’ebé ami uza, wainhira hotu ona ami lori fali. Ami nia haris fatin di’ak hela, atu sentina mak senti ladun saudável, tanba bee la iha”, Maria Febiana Santos dos Reis lamenta ba Neon Metin iha eskola fatin, EBC Nú. 1 Balibo, 16/10.

Relasiona ho problema refere, ba Neon Metin konfirma ho Profesor Lorenço Tavares iha EBC Nú.1 Balibo, Profesor rekoñese duni katak iha sira nia eskola bee la iha no estudante rasik mak esforsu hodi lori bee hosi uma ba eskola.

“Durante ne’e ami haruka duni labarik sira lori bee iha masa aqua de’it. Kada semana ami haruka sira lori be aqua dala rua ka dala tolu, hodi enxe ba labarik estudante sira nia sentina no haris fatin”, dehan Profesor Lorenço ba Neon Metin, iha Eskritóriu EBC Nú.1 Balibo, 16/10.

Neon Metin observa katak situasaun ne’e difikulta prosesu aprendizajen no fo impaktu bot ba estudante feto sira.

Maria Febiana Santos dos Reis esplika katak nudar estudante feto sente iha difikuldade boot tebes. Ami sente la seguru wainhira la iha bee hodi uza ba haris fatin. Profesor Lorenco mos rekoinese situasaun ne’e. Nia informa difikuldade mak sira hosoru li-liu ba alin feto sira. Ba profesor mane inklui alunu mane, sira atu soe bee ki’ik, bele hamriik iha kualker fatin, maibé ba estudante feto sira kasian la halimar tanba sentina mak fo’er.

“Fatin kaza de bañu feto ho mane ne’e iha hotu, mais ita tama tahan la bele. Alin feto sira obrigatóriu tenki tama, sira atu ba fatin públiku iha li’ur labele. Ne’e mak todan ba sira wainhira atu so’e bee iha li’ur. Atu di’ak ka la di’ak sira obrigatóriu tenki tama iha sentina ida fo’er ne’e”, Profesor Lorenço esplika ba Neon Metin.

Lorenço mos esplika katak, “Bee iha ne’e araska. Iku-ikus ne’e ema fó ami fiber, maibé oinsá mak fiber ne’e ami atu enxe bee? Ami haruka estudante sira atu enxe bee ba fiber ho aqua boot sente la di’ak. Ne’e mak ami iha ne’e kada mestre hatama sentavu 0.50, alunu sira sentavu 0.25 tau hamutuk hodi sosa fali bee. Kada fulan ida ami bele enxe bee ba fiber ne’e dala rua ka tolu para labarik sira uza”.

Nia dehan alunus iha eskola ne’e hamutuk 400 resin, mestre 20 resin mak hatama osan sentavus 0.25. Mais realidade  lista tarjetu estudante la hatama, tanba estudante sira iha problema finansiamentu. Maibé profesor sira komprende situasaun ne’ebé estudante sira hosoru, hodi fo toleransia ba estudante sira.

Profesor ne’e mos esplika katak sira nia fatin ne’e hahú inísiu kedas bee la iha. Sira iha esforsu dada bee duni maibé komunidade rasik konsiénsia la iha hodi sobu. Hosi Diresaun Ministériu Edukasaun Munisípiu Bobonaru iha ona promote ho sira atu dada bee ba eskola refere maibé sira hein hela, rejultadu to’o agora seidauk iha.

LEAVE A REPLY

Please enter your comment!
Please enter your name here