Reportazen Ricky Samlelo
“Normalmente ita halo importasaun barak ne’ebe ke mai husi via terrestre no mos máritima ninian mai ho kontetores ne’e bara-barak, maibe ikus ne’e sira fila ba ho truck no kontetores ne’ebe mamuk, se sorti diak ita exporta netik kafé kontetores sanulu ba mais kuitadu ho kontetores sira ne’ebe mak mamuk ne’e kala tula mak besi a’at sira deit” . Julião Ximenes
Ministeiru Turizmu Komersiu no Industria (MTCI), liu husi Diresaun Geral do Komersiu realiza seminariu ho tema “ Esbosu Politika Nasional Komersiu Exportasaun, atu Reduz Dezekilibriu Balansu Komersial”.
Diretor Jeral Diresaun Komersiu, Cosme Fatima Baptista hateten liu hosi seminariu ida ne;e atu halo diskusaun konaba dezenvolve produtu lokal sira, hodi hala’o exportasaun para bele reduz importasaun, atu garante ba dezenvolvimentu kresimentu ekonomia iha rai laran.
“Objetivu ne’e atu dezenvolve produsaun de produtus exportasaun atu bele reduz gradualmente importasaun, se ita iha kapasidade ita bele aumenta ita nia volume de exportasaun I nune’e neneik-neneik ita bele reduz dezekilibriu balansu komersial iha Timor Leste. Atu hanoin sira ne’e bele hetan prátika iha realidade moris populasaun ninian, iha dezenvolvimenetu ekonomiku ba rai ida ne’e. Presija programa sira ne’ebe realistiku que ita bele hala’o ka aplika husi ministeiru Komersiu Industria liu-liu husi Diresaun Geral Komersiu nian”,dehan Cosme iha salaun ekontru CCD, 28/12.
Diretor Geral Komersiu akresenta liu tan katak dalabarak Timor oan sira partisipa no promove ita nia produtu iha feira no expozisaun sira no kompradores potensial internasional sira hakarak sosa produtu sira, maibe volume produtu Timor-Leste nian la sufisiente
“Realidade to agora ita hare’e katak dalabarak ita koalia kona ba komersiu no dalabarak ita ba partisipa iha expozisaun no feira sira nasional no internasional sira, ita promove ita nia produtus oioin iha ne’eba maibe kuandu kompradores potensiais sira ne’e husu ita para fan ita nia produtu ba sira nia merkadu, ita laiha kapasidade para bele atende sira nia pedidu tamba ita nia produsaun rai laran ne’e fraku tebes. No volume produtu Timor nian sira ne’ebe mak oras ne’e exportasaun ba rai liur kafé mak barak liu mais kuantidade ita la to’o ho nasaun sira ne’e, dehan Cosme
Iha sorin seluk jornalista halo entrevista ho Diretor Nasional Operasaun Aeroneira, serbisu Alfandega, Julião Ximenes katak politika ida ne’e atu dezafia governu nia preparasaun diak liu tan, tamba Timor-Leste importa sasan barak, via terrestre no máritima uza truck no ró mai lori sasan barak, maibe ikus transporte refere fila ho mamuk.
“Husi seminariu ne’e diak teb-tebes tamba fanun fali ita nia politikus sira no dezafia governu para bele iha preparasaun diak liu tan, normalmente ita halo importasaun barak ne’ebe ke mai husi via terrestre no mos máritima ninian mai ho kontetores ne’e bara-barak, maibe ikus ne’e sira fila ba ho truck no kontetores ne’ebe mamuk, se sorti diak ita exporta netik kafé kontetores sanulu ba mais kuitadu ho kontetores sira ne’ebe mak mamuk ne’e kala tula mak besi a’at sira deit”, dehan Julião Ximenes
