Home Notisia Agrikultor Iha Seloi Kraik-Aileu Depende Ba Udan Been Tanba Irigasaun Hetan Estragus

Agrikultor Iha Seloi Kraik-Aileu Depende Ba Udan Been Tanba Irigasaun Hetan Estragus

564
0
Agrikultor Alfredo Pires Sarmento iha Seloi Kraik. [Foto: Francisco JDA | 27.10.2020]

Reportazen Francisco JDA

Agrikultura nudar seitor importante iha Timor-Leste, hare hosi dadus sensu 2015 hatudu katak 89.8% familia mak moris depende ba agrikultura, hodi sustenta moris loron-loron nian no tuir planu rekuperasaun ekonomia konsidera setór agrikultura nu’udar setór importante no prioridade atu investe ho seriedade, hodi asegura soberania ai han ba komunidade.

Neon Metin halao kobertura iha Area Seloi Kraik municipiu Aileu, hodi hare direitamente situasaun agrikultura ne’ebe mak kontinua esforus-an hodi halo produsaun, maibe kontinua hasoru difikuldade, liu-liu iha propagasaun COVID-19, afeta makaas komunidade agrikultor sira nia produtu, tanba la asesu merkadu.  

Neon Metin dadalia ho agrikultor iha Seloi Kraik, Alfredo Pires Sarmentu ne’ebe hateten depende ba udan been, bainhira udan la mai difikulta serbisu agrikultor sira atu kuda modo no produsaun sira seluktan.

Nia dehan udan laiha susar atu halo kantreiro tanba la iha bee, maske iha duni iragasaun maibé irigasaun refere kotu no labele asesu bee ho diak.

“Agora nee irigasaun kotu tiha ne’ebe bee araska los, so udan mak bele, udan iha nee modo sira ami kare deit, maibé udan la iha ami kuda deit batar no hein udan deit, iha duni estrada maibé kareta mak selu karun mak modo saku rua selu $15.oo no saku haat $20.00 lori ba Dili, to’o Dili balun sosa no balun la sosa, ho foli $0.50 ka 0.25 sentavus”, hateten Alfredo.

Nia hatutan katak antes COVID-19 sedauk akontese, osan tama diak no bee mos diak, “kuda modo naran deit, ami hein deit iha nee, fulan sira mak mai tetu maibé agora nee osan mos arraska no irigasaun mos la iha no labele ba Dili”, hatete Agrikukltor Alfreduo Pires Sarmentu iha Suku Seloi Kraik Aldeia, Kasamou, 27/10.

Nia konfesa katak,  antes COVID-19 seidauk tama, modo futun neen $5.00, ne’e selu ho kareta sei iha rendimentu oituan, mais agora ne’e la iha ona, modo nia folin mak tolu $1.00, nune’e kantreiru barak abandona tanba bee.

Konaba natar Alfredo dehan katak tinan ne’e araska, tanba bee laiha, kuda hare maibe to’o koileta hetan oituan deit tanba bee maran no nia produsaun la sae ho diak

Ho situasaun nee jornalista sira dadalia ho Adjunta Municipiu Aileu, Victoria Mesquita do Rego informa katak agrikultór sira sei iha nivel mais baixo, entaun preparasaun ba agrikultura sira presiza iha formasaun barak, nune’e produtu sira ne’ebe faan iha merkadu bele dada ema atu sosa.

“Agrikultor bele prepara maibé se sira la iha soft skill atu dada ema sosa sira nia sasán ne’e labele, entaun presiza formasaun, iha ema extensionista mak to’o iha suku sira, hamutuk 33 maibe sira iha deit 18 deit iha municipiu no fahe to’o iha postu sira, ho orsamentu kiik, oinsá mak fahe to’o iha diresaun sira ba nasional to’o iha municipiu atu bele korresponde. Hakarak soberanu nafatin mak governu mos hare tetu sasán hirak ne’e, labele korresponde dala ida deit maibé gradual konta ho ita nia forsa ne’ebe iha”, hatete Adjunta Municipiu Aileu Victori Meskita do Rego

Nia dehan hortikultura iha Aileu mak prodús modo,  alende ne’e mos produs bani been maibé barak liu depende ba mudansa klimátik,a ne’ebe iha nune’e mos afeta ba produtividade komunidade sira nian tanba iha Aileu hortikulktura mak dezenvolve makaas.

Pandemia COVID 19 lori reflesaun katak presiza duni investe iha setór agrikultura hodi nune’e bele fó ai han natoon ba komunidade sira, tanba Pandemia COVID-19 sidauk iha serteza atu lakon. Nasaun sira hanesan Timor-Leste ne’ebé depende makas ba importasaun husi rai li’ur, liu-liu nesesidade báziku sira sei hetan ameasa no laiha serteza ba nesesidade ai han ne’ebé sufisiente.

Governu submete ona proposta orsamentu 2021 nian ba Parlamentu Nasionál no tuir kalendáriu konsultasuan públiku no diskusaun iha plenáriu sei hahú iha fulan Novembru 2021. Iha dékada ikus ne’e alokasaun orsamentu ba setór agrikultura maka la to 3 % ka menus husi porsentu 3%, maski iha plataforma polítika governu nian maka define agrikultura nu’udar setór importante.

Neon Metin halo kobertura konaba agrikultura iha area rural, nudar parte hosi atividade Media Tour ne’ebe organiza hosi Asosiasaun Jornalista Timor Lorosa’e (AJTL) serbisu hamutuk ho Oxfam, ho objetivu lori jornalista sira ba area rural, hodi buka tuir situasaun ne’ebe agrikultor sira hasoru, maske rai buras no iha produsaun barak maibe susar atu asesu merkadu tanba estrada at no sedauk iha intensaun masimu hosi governu.

Print Friendly, PDF & Email

LEAVE A REPLY

Please enter your comment!
Please enter your name here