Reportajen Umbelina dos Reis
Reprezentante povu iha Uma-Fukun Parlamentu Nasional (PN) husu Ministériu Justisa (MJ), atu tau atensaun ba estranjeiru Xineza Sira ne’ebé kontratu no okupa rai durante 50 anos.
Tuir deputada bankada FRETILIN, Lidia Norberta Martins hateten okupasaun rai ne’e iha barak mak halo kontratu rai hanesan broker, balun ema estranjeiru sira kontratu ba tinan 50, no husu Ministériu Justisa haree ida ne’e.
“Tanba se wainhira la haree konabá ida ne’e, maka rai sira ne’e to’o ikus estranjeiru bele okupa hotu, durante ne’e ema ko’alia halimar dehan Bairo Pite ne’e sai banana root, banana root ne’e mak sei halo fali ba fatin sira seluk, “dehan Deputada Lidia iha Plenária, Segunda 16/01.
Iha fatin hanesan deputadu bankada FRETILIN, David Dias Mandati hatutan, komérsiu iha Dili laran ne’e atu sidadaun sira uza de’it, maibé ohin loron okupadu tiha ona, “klaru ita nia joven sira tenki sai duni ba li’ur, tanba atu komérsiu mos ema mak okupa hotu tiha ona, favor fo atensaun mos ba ida ne’e” tenik nia.
Nia dehan okupasaun ba rai ida ne’e dalaruma ema husi estranjeiru labele iha direitu atu sosa rai, maibé broker ne’e ita Timoroan sira mak lori ba tau fali sira nia naran, depois ema sira ne’e sosa tia rai iha Timor.
