Reportajen Umbelina dos Reis
Reprezentante povu iha Uma-Fukun Parlamentu Nasional (PN), preokupa ho estrada iha Suku Loidahar, Darulete, Leotela, Asumanu, Lukulai ho Cova.
Tuir Deputada Lidia Norberta Martins, katak estrada iha Suku Loidahar, ba to’o Darulete tesik ba Leotela ba to’o iha suku Asumanu ne’ebé mak liga mos ba Leorema, estrada ne’e kondisaun aat tebes, foin da-dauk ne’e traballadór ida hakotu iis iha Korea Sul loron hirak liu ba, nia família lori nia mate isin ba nia moris fatin Asumanu, família sira hulan de’it kaixaun.
Nia hatutan estrada ne’e difikulta mos governu fahe subsídiu $200 no impata programa PNDS tanba de’it estrada. “Ne’ebé ami rekomenda ba governu tenki hare’e estrada ne’e, nomos ba suku Lukulai dalan ida ne’ebé mak aat tebe-tebes, ne’e la’os tanba de’it hanesan Likisa oan hakarak ko’alia de’it ida ne’e la’e, deputadu barak mak ba ona iha ne’eba, dalan ne’e ladi’ak” dehan Deputada Lidia iha Plenaria, Segunda, 16/01.
Nia salienta, tuir fali iha suku Cova, iha tempu Indonézia nian buat ida Abri masuk desa sira iha kedas polítika hadi’a dalan, maibé ita nian laiha forsa destaka iha fatin konabá kondisiona sira ho estrada.
“Iha Suku Leohitu tau ba Cova ne’e ita haree dalan di’ak, maibé atu to’o ona ba iha suku Cova nian dalan ne’e ku’ak luan boot, entaun ema sira hela iha dalan ni-nian fatin mos kloot, kareta mos ses malu ladi’ak no dalan ne’e so ba kareta ida de’it mak bele liu mezmu ke ho risku ne’ebé boot, no oinsá mak forsa ida ne’ebé mak destaka ba iha parte fronteira Cova nian bele assegura komérsiu ilegail ne’e, se ninia impedimentu ne’e barak tebe-tebes liu husi dalan ida ne’e” tenik nia.
Nia sujere ba governu bele haree ba dalan sira aat ne’e, tanba konstrusaun estrada iha Díli kompañia sira lais los para bele halo, to’o iha dalan foho ne’e laiha.
“Entaun bainhira mak ita bele halo konstrusaun ne’e se durante ne’e ita hakilar área rural mak di’ak, ida seluk mak Hatubuilico, agora iha reportajen ida ne’ebe mak jornalista Franseza ida halo, ne’ebé mak iha reportajen ida ema fo sai konabá kondisaun dalan aat ne’e, se ema seluk rai dook hateke mai ita momos hela, tanba sa mak ita ida rai na’in, ita sira membru governu mos foho oan mak mai Dili hela ne’e, ne’e mos ita labele haree buat sira ne’e.” Deputada Lidia
Iha fatin hanesan, Vise-Prezidente Parlamentu Nasional, Deputada Maria Angelina mos reforsa kona-ba estrada hirak ne’e, tanba iha fin de semana foin da-dauk ne’e, nia mos ba halo vizita kontaktu eleitorál iha suku Lukulai, maibé estrada maka perigozu tebe-tebes no demaziadu aat ho nune’e husu ba Ministru bele hato’o hela ba Ministru Obras Publikas (MOP).
“Tanba ne’e mak ami husu ba suku sira ne’ebé ha’u temi, favor ida fo prioridade tanba sira mos iha produtu lokal hanesan kafé, tanba ohin loron governu prioridade ba reabilitasaun ba kafé, mais kuandu sira la asesu ba estrada sira nia produtu mos labele to’o iha konsumidór sira nia liman” nia konklui.
