Reportajen Umbelina dos Reis
Deputada Bankada FRETILIN, Helena Martins Belo kestiona líder lokál Suku Buruma no Abafala, Munisípiu Baucau, ne’ebé ladun tau atensaun ba servisu ho máximu, liu-liu akumula lista naran komunidade nian, hodi impede atu hetan sira nia direitu simu subsídiu $200 no osan idozu.
Nia hatete tinan kotuk Suku Abafala Postu Administrativu Quelicai, idozu na’in 4 bai-bain simu hela, depois sira halo tia verifikasaun dehan laiha fali, “ne’e mak ha’u husu hela dadus maibé to’o agora sira sedauk envia”.
Nia akresenta, subsídiu $200 kuaze husi Munisípiu Baucau seidauk hetan, liu-liu iha Suku Buruma, nia falla ne’e mai husi na’i Xefe Suku ho Xefe Aldeia sira ne’ebé rekolla ona dadus .
“Dala barak Xefe Suku sira mak laiha fatin hodi atende nia povu ne’ebé atu hetan subsídiu, tanba akontesimentu nee iha Baucau, Buruma” dehan deputada Helena.
Subsídiu primeiru ba Covid-19, $200 ema hotu hetan, maibé tanba saída mak subsídiu agora komunidade nia dokumentu laiha. Deputada ne’e husu ba Ministru Estatál hodi enkamiña no bolu na’i Xefe Suku Buruma hodi fo atensaun.
