Reportajen Adroaldo “Saretukau”
Komunidade Suku Leuro, Postu Administrativu Lospalos, Munisípiu Lautem preokupa ho klínika iha sira nia Suku tanba laiha parteira, ai-moruk menus, no doutor ida de’it hodi halo atendimentu ba pasiente nia moras bainhira ba konsulta.
Haktuir komunidade Justina Soreas hosi Aldeia Lutu-Rula, Suku Leuro katak, uluk sira iha parteira, maibé agora la iha ona. Doutor mos iha maibé nia hela fatin dook iha Lospalos vila, susar tebes nia viajen ba mai hodi halo atendimentu ba pasiente sira tanba nia mesak, maske klínika refere loke hosi Segunda to’o Sesta.
“Doutor ida de’it, parteira mak agora la mai ona. Uluk parteira iha ne’e, dala ruma partus iha uma, parteira ba atende iha uma de’it, agora atu partus tenki ba Lospalos, tanba parteira la iha,” dehan Justina ba Neon Metin.
Iha fatin hanesan komunidade Felicidade Fernandes hato’o preokupasaun hanesan katak “Klínika Leuro nian ne’e, uluk di’ak los maibé agora ne’e parteira mos la iha ona, doutor de’it. Ami nu’udar komunidade bai-bain ami halo lutu, hale’u lutu iha klínika ne’e, agora lutu mos aat ona, parteira mos la iha tan, doutor de’it, ne’ebé atu partus ne’e ba kedas kota (Lospalos) ne’e bele ga lae,” Felicidade preokupa ba kondisaun klínika iha sira nia Suku.
Komunidade sira husu atu Ministériu Saúde atu tau netik matan ba sira nia klínika ne’e, atu nune’e labele difikulta komunidade sira ne’ebé moras hodi konsulta. “Doutor nia atendimentu lor-loron di’ak, maibé ai-moruk mak la iha. Hosi kota mai, pois udan tan, mai ai-moruk la iha, ita ba mos ai-moruk Paracetamol de’it, ne’e atu halo saída, ne’e husu ba Ministériu Saúde, se bele karik aumenta ai-moruk ruma, se labele entaun taka de’it.” Felicidade hato’o.
