Reportajen Santina Lucia da Costa
“Hau nia inan nia kontribuisaun durante nia moris ba iha partidu, ba iha organizasaun OPMT no atividade seluk ne’ebé nia hala’o iha públiku, hau espera katak jerasaun foun feto sira bele uza pratika, ne’e sai hanesan ezemplu ida ba oin, buka matenek, buka dalan ne’ebé mak sira hakarak ba oin, edukasaun importante tebes ba ita nia jerasaun agora“. Dedy Jordão Alves.
Prezidente Repúblika deside fó onra, títulu póstumu, ba Buibere Merita Alves “Bi –Kiak”, ho kondekorasaun Ordem Timor-Leste, grau Colar, títulu póstumu. Grau ida ne’e as liu ne’ebé Prezidente Repúblika bele fó ba entidade ka individualidade, tuir Dekretu-Lei númeru 20/2009 ho data 6 maiu, Ordem de Timor-Leste.
Merita Alves “Bi-Ki’ak” ninia dedikasaun, barani, espíritu sakrifísiu no determinasaun, iha períodu tomak luta libertasaun nasionál no, iha mós iha tempu ukun an, atu hatuur justisa sosiál,
Ho kondekorasaun espesiál ne’e, Prezidente Repúblika, ho Estadu Timor-Leste nia naran, hasa’e as memória eroína ida nian ne’ebé husik hela legadu boot ida ba ita hotu.
Oan mane boot Dedy Jordão Alves hateten senti ksolok tebes bele hetan konvite husi Prezidente Republika, hola parte iha serimonia ne’e no sente surpreendente ho aprezentasaun video ne’ebé hatudu.
“Hau sente orgullu teb-tebes hanesan oan husi saudoza Merita Alves, ohin hau haree kolegas barak liu husi aprezentasaun video, sira hato’o sira nia haksolok no sente hetan inspirasaun barak husi hau nia inan, kontente bainhira hau nia inan sei moris, sai hanesan ema edukadora ida, inspiradora, lutadora ba feto nia direitu, nia mos sai hanesan kontribuidora ida ba dezenvolvimentu Timor-Leste nian,” hateten Oan boot husi Saudoza Merita Alves Bi-Ki’ak, Dedy Jordão Alves iha Palasiu Prezidensial Nicolau Lobato, Bairu-Pite, loron, 10/6.
Dedy Jordão Alves espera katak husi eventu ida ne’e, ba ema sira ne’ebé mak akompaña tranzmisaun direita, no husi Live streaming YouTube ne’e bele uza eventu ne’e, liuliu feto maluk jerasaun foun sira bele kaer metin produtu ne’ebé ohin ita nia feto maluk sira husi OPMT, no ekipa peskiza sira halo ne’e kaer metin produtu ne’e, kontinua kria istória kona-ba feto nia partisipasaun iha dezenvolvimentu nasaun ne’e ba oin nafatin.
“Hau nia inan nia kontribuisaun durante nia moris ba iha partidu, ba iha organizasaun OPMT no atividade seluk ne’ebé nia hala’o iha públiku, hau espera katak jerasaun foun feto sira bele uza pratika, ne’e sai hanesan ezemplu ida ba oin, buka matenek, buka dalan ne’ebé mak sira hakarak ba oin, edukasaun importante tebes ba ita nia jerasaun agora,” informa Dedy Jordão Alves.
Saudoza Bi-Ki’ak iha oan hamutuk na’in tolu, mane rua no feto ida.
