Reportajen David da Costa Gusmao
Governu Nova Zelándia liuhusi nia embaixada iha Timor-Leste hamutuk ho Oxfam iha Timor-Leste, akompaña husi Sekretáriu Estadu Protesaun Sivíl (SEPS), ofisiálmente entrega uma ne’ebé seguru, reziliente no inkluzivu ba benefisiáriu Antonio do Rosario ho nia família iha Aldeia Metin, Suku Lahane Oriental, postu Administrativu Nain Feto no Munisípiu Dili.
Country Director Oxfam iha Timor-Leste, Fausto Belo Ximenes dehan iha tinan kotuk bainhira akontese inundasaun Antonio nian uma aat hotu, ho ida ne’e Oxfam servisu hamutuk ho komunidade iha ne’e hodi halo reabilitasaun ba nia uma, no ohin loron entre fali uma ne’e ba uma na’in.
“Ita hamutuk ho embaixada Nova Zelándia no Protesaun Sivíl no mós komunidade sira iha ne’e, atu entrega uma ofisiál ba uma nain Antonio. Uma ne’e Oxfam servisu hamutuk ho komunidade sira iha ne’e, hodi reabilita, depois de tinan kotuk ba inundasaun bainhira uma ne’e destruidu tomak, maibé oin loron ita konsege kompleta uma ne’e hodi entrega ba iha uma na’in,” dehan Country Director Oxfam, Fausto Belo ba jornalista sira, hafoin entrega uma ne’e, iha Aldeia Metin, Suku Lahane Oriental, Segunda 4/07.
Nia haktuir, ida ne’e parte husi Oxfam ninia servisu iha Timor, atu suporta komunidade atu nune’e sira bele rezilente liu, no mós atu harii fila fali uma, ho asesu ne’ebé diak-liu ba ema defisiénsia sira.
Iha fatin hanesan Embaixadór Nova Zelándia iha Timor-Leste, Filipe Heuit, hatete iha tinan kotuk sékulu seroja estraga ema barak nia moris iha Timor-Leste no Timor-Leste hatudu nia forsa no rezilensia boot hodi rekupera husi inundasaun iha tinan kotuk.
“Ita presiza rekoñese katak, susar tebes atu hadia situasaun ne’e, no seidauk kompletu ba família barak, ne’ebe komunidade sira labele preokupa, ami hakarak atu hadia diak-liu, mas presiza tempu no aprende husi buat ne’ebe liu. Tanba ne’e ita hakarak atu prepara diak-liu ba eventu sira iha future bele responde lalais diak-liu tan bainhira mosu sékulu seroja, atu nune’e projetu ne’e bele diak ba ita nia família sira. Ita hakarak uma ne’e ita nia família hotu sira sente seguru,” dehan Filip
Diretór Jerál liuhusi Sekretáriu Estadu Protesaun Sivíl (DJ-SEPS), Ismael da Costa Babo haktuir kontribui sira ne’ebe maka ohin fó ba afetadu sira, hatudu sinál pozitivu ne’ebe parseiru sira apoiu. Inundasaun iha tinak kotuk, mundu internasionál no Embaixadór sira iha Timor-Leste hodi fó sira nia solidariedade ba afetadu inundasaun sira. Uma ida ne’e hanesan sinál amizade ne’ebé kesi povu Timor-Leste ho Nova Zelándia, iha kualkér saida maka akontese iha futuru.
Antonio Do Rosario nu’udar benefisariu ba uma ne’e, dehan iha tinan kotuk bee tama ami nia uma aat hotu no terus, maibé agradese ba Maromak no ba governu Nova Zelándia no Timor-Leste ne’ebe maka servisu hamutuk, hodi bele oferese ona ba uma ne’e. Iha parte seluk nia triste tanba nia maluk balun ne’ebe mós afeta ba inundasaun balun seidauk hetan uma.
“Ita kontente ka la kontente, buat ne’ebe estadu oferese ona mai ita, obrigadu ba grasa Maromak nian, ohin loron hau bele hetan ona uma. Hau kontente tanba estadu Nova Zelándia mai ho estadu Timor-Leste kolabora hamutuk ohin loron ami simu ona uma ida ne’e. Ami balun hetan ona maibé balun seidauk, espera katak maluk balun ne’ebe seidauk hetan, iha tempu tuir mai bele hetan hotu,” Antonio espresa nia sentimentu.
Entretantu uma ne’ebe maka konstrui husi Oxfam ne’e durante fulan tolu no hetan apoiu osan husi governu Nova Zelandia ho montante $ 7 mill Uma ne’e medida 9×7 m, iha kuartu 2, sala 1, dapur 1.
Tuir dadus husi Sekretáriu Estadu Protesaun Sivíl (SEPS) konaba inundasaun ne’ebé akontese iha loron 4 Abríl 2021 ne’e, uma kain 1031 maka afetadu ba dezastre, iha 40 resin lakon vida no 10 resin to’o agora seidauk hetan sira nia mate isin.
