Reportajen David da Costa
kompañia Kunyao Consultion sport person husi Nasaun Xina, hakarak halo dezenvolvimentu iha area ka Sektor haat iha Timor-Leste maka Parke Industriál, Turizmu no Divertimentu, Minarai no Rekursu Naturais no mós Infraestrutura no Konetividade. Sira fiar katak bele harii projetu sira ne’ebé la’ós de’it hamosu valór maibé mós aliña ho aspirasaun povu Timor nian.
kompañia Kunyao Consultion sport person, Ziheng Luo, hatete, Onra boot ida ohin bele hasoru Prezidente Repúblika José Ramos-Horta, tanba ne’e hakarak espresa admirasaun kle’an ba Timor-Leste nia dedikasaun moris tomak ba dame no rekonsiliasaun, no ba Timor nia kontribuisaun sira ne’ebé notavel hodi hametin Timor-Leste nia parseria sira ho Xina. Timor-Leste b nia lideransa sai instrumentál hodi kria nasaun ida ne’ebé estável no haree ba futuru.
“Ha’u hakarak fahe ho ita-boot sira projetu balun ne’ebé la’o hela, ne’ebé ami orgullu atu servisu iha Timor-Leste, iha kooperasaun ho COVEC no Norinco International Corporation Ltd. Ami estabelese ona ami nia empreza, BOA, iha Timor-Leste, no agora daudaun iha projetu ativu iha Aileu no Baucau, iha fulan 3 nia laran ami kria ona empregu liu 200 ba traballadór lokál Timor-oan sira,” dehan Ziheng Luo bainhira remata enkontru ho Prezidente Repúblika José Ramos-Horta iha Palásiu Prezidensiál Bairu-Pite, Tersa 5/07.
Nia haktuir, projetu sira ne’e la’ós de’it avansa ona infraestrutura, maibé mós kria ona empregu sira ne’ebé signifikativu no oportunidade sira ba harii abilidade sira.
“Haree ba oin, ami mós atu esplora tan oportunidade sira ba kooperasaun entre Timor-Leste no Xina, ho objetivu komún atu hamosu empregu, hasa’e rendimentu nasionál, no hasa’e PIB nasaun nian. Agora daudaun ami foka hela ba setór xave haat maka Parke Industriál, Turizmu no Divertimentu, Minarai no Rekursu Naturais no mós Infraestrutura no Konetividade,”Nia dehan
kompañia Kunyao Consultion sport person inklui empreza estrutura besi nian ida ne’ebé maka importante liu iha Xina. No sira prontu atu partisipa iha dezenvolvimentu parke industriál sira fornese infraestrutura ba espasu fábrika sira iha futuru, armazenamentu, no instalasaun lojístika sira.
iha fulan Outubru, Timor-Leste sei adere ba Asosiasaun Nasaun Sudeste Aziátiku (ASEAN), ne’ebé fiar katak sei atrai fábrika no empreza sira mai Timor-Leste, hodi kria demanda ne’ebé aumenta ba espasu industriál. Ho ida ne’e fiar katak sei harii fundasaun ida ne’ebé metin atu atrai empreza sira no kria empregu rihun ba rihun ba populasaun lokál Iha Timor-Leste.
“Timor-Leste nia beleza naturál estraordináriu. Ita haree potensiál maka’as iha dezenvolvimentu ninia iha area indústria turizmu. Ami nia empreza mós espesializa iha Capsule House, arkitetura modular ida, ho implementasaun lalais ne’ebé bele uza ba akomodasaun,”nia hatete.
Hanesan ohin temi ona, Timor-Leste adere ba ASEAN iha fulan Outubru, otél Capsule sira oferese solusaun ida ne’ebé asesivel, efisiente, no eskalavel ba habelar infraestrutura turizmu ajuda atrai vizitante internasionál sira enkuantu hadi’a kapasidade ospitalidade nasaun nian. Tanba Timor-Leste riku ho rikusoin petróleu no minerál. kompañia hakarak tebes atu esplora parseria sira ho empreza estatál Timoroan sira hodi dezenvolve setór sira-ne’e ho responsabilidade.
“Ami nia objetivu la’ós de’it atu utiliza rekursu sira ho efisiente, maibé mós atu garante katak valór hanesan rendimentu, impostu sira, no benefísiu sira ba tempu naruk hela iha Timor-Leste nia laran no apoia nia povu,”nia esplika.
Nune’e kompañia sei kontinua nia serbisu principal iha konstrusaun estrada sira no hasa’e konetividade nasionál liu-liu hadi’a estrada iha área rurál sira. Ida-ne’e sei ajuda hamenus tempu viajen ba kapitál, hadi’a konveniénsia ba rezidente lokál sira, fasilita fa’an produtu agríkola sira, no ikusmai hasa’e padraun moris ba ema sira iha área rurál sira. Infraestrutura ne’ebé di’ak liu mak xave atu loke kreximentu ekonómiku no dezenvolvimentu sosiál, no kompañia iha kompromisu atu apoia Timor-Leste iha área vital ida ne’e.
“Ami fiar katak ami bele harii projetu sira ne’ebé la’ós de’it hamosu valór maibé mós aliña ho aspirasaun povu Timor nian. Ami hein atu servisu hamutuk hodi harii futuru ida ne’ebé prósperu no inkluzivu,” Sira fiar.
Iha fatin hanesan Adidu komérsiu Timor-Leste ba Xina, Aires Aparicio Guterres, hatete, ohin mai iha ne’e hamutuk ho investor Xinez, Kompañia Kunyao Consulation sport person, sira mós estabelese ona sira nia kompañia iha Timor, ohin akompaña sira ho ekipa hodi mai komprimenta Prezidente Repúblika José Ramos-Horta ne’ebé sempre suporta investor sira husi rai ne’ebé de’it hodi mai investe iha Timor-Leste.
Kompañia Kunyao Consulation sport person mos hato’o ba Prezidente Repúblika saida mak oras ne’e sira investe no halo daudauk iha Timor ne’e, area saida tan mak sira hakarak investe ba. Tanba Prezidente Repúblika ema ida ne’ebé mós famozu iha mundu, ho ida ne’e mak kolega sira, ema barak sempre mai hakarak hasoru Prezidente Repúblika, hodi komprimenta no rona Prezidente Repúblika nia hanoin no vizaun kona-ba dezenvolvimentu Timor nian ba oin, nune’e sira mós hakarak hola parte.
Sira mós kontente tebes iha Timor, tanba Timor hanesan nasaun joven potensia boot tebes, bele sai hanesan nasaun seluk ho nia povu ne’ebé omilde no laran di’ak. Sira mós hatene depois vizita husi Prezidente Repúblika ba Xina tempu hirak liu ba, no mós Primeiru Ministru nia vizita ba Xina iha buat barak mak nasaun rua Xina ho Timor kompromete ona no se halo iha area oi-oin hanesan Agrikultura, Peskas, Turizmu, Edukasaun, Infraestrutura seluk tan.
“Prezidente Repúblika mós sempre apoiu no husu atu sira investor tenke servisu hamutuk ho governu mós setór privadu Timor nian, atu bele atiji ita nia planu ba dezenvolvimentu iha area oi-oin,” nnia dehan.
Nune’e mós Prezidente Republika José Ramos Horta husu atu bele servisu ho seriédade no responsabilidade hodi bele ajuda dezenvolve no bele kria kampu traballu ba povu liu-liu joven sira iha rai laran.
