Reportajen Joselina dos Santos
Asosiasaun Chega Ba ita (ACbit), husu Governu liu-liu ba Ministériu Agrikultura, atu iha futuru tulun grupu feto potensiál no komunidade vulneravél sira, atu bele lori sira nia produtu lokal ba merkadu internasional sira tanba iha parte ida dala ruma maluk sobrevivente ka Komunidade vulneravél sira badinas halo produtu lokal maibe fó folin kiik liu entaun hariku fali sosa na’in-sira, liu-liu ba emprezariu.
Reprezentante Asosiasaun Chega Ba ita (ACbit), Celestina de Almeida hatete, durante ne’e sira preokupa ba Bee Moos ne’ebe dala barak inan feton sira labele asesu nomos ba oan sira tanba distansia bee matan dook tebes entaun inan feton sira ne’ebe ho idade avansadu labele ba koru bee iha mota.
“Iha área rural inan feton sira mos labele konsumu hahan naton liu-liu iha parte ekonomia nian, iha parte ida sira mos iha talentu diak nomos iha produtu lokal ne’ebe iha, maibe susar atu implementa buat ruma tanba kestaun bee”, dehan Reprezentante Asosiasaun Chega Ba ita (ACbit), Celestina de Almeida, ba Neon Metin iha Hotel Luz Clarita, 09/12.
ACbit husu Governu atu iha futuru konsidera hola mos feto sobrevivente sira nia ai-han lokal ne’ebe iha, atu nune’e bele tulun sira, atu asesu ba merkadu internasional susar tebes nune’e advokasia ne’ebe sosiedade sivil halo, oinsa atu kuidadu produtu lokal sira labele dodok no tasak, entaun dala ruma estraga sira nia produtu lokal iha tinan naruk nia laran.
