Home Notisia Sufer Bis Maliana Ida Saude Diak, Aban ba Teste COVID-19

Sufer Bis Maliana Ida Saude Diak, Aban ba Teste COVID-19

1363
0
Bis Atabae (Foto: Picuki.com)

Sufer Bis ho rute Maliana – Dili – Maliana, tula pasajeiru hosi fronteira Batugede iha 1 Abril nia kondisaun saudavel hela. Nia tula duni pasajeiru nain 25 maibe nia la hatene se kazu positivu 3 ne’e hosi nia pasajeiru. Nia foin hetan kontaktu hosi mediku sira no aban mak ba test.

Sufer Bis Beckham, halai ba-mai Malian-Dili Mario Antonio, esplika ba jornalista via telefone katak nia mak tula duni ema mai hosi fronteira ba Dili, maibe laos nia bis mesak. Iha tan bis ida naran Bintang mos tula hotu.

“Hau nia bis mak tula duni pasajeiru hosi batas ba Dili iha loron 1 Abril. Hau tula ema nain 25, no sira hotu tun iha Hotel Katuas. Maibe laos hau nia bis deit, iha mos bis seluk ida tan, naran Bintang, “ Mario Antonio, Sufer Bis Beckham esplika via telefone, ohin, 13/04.

Bainhira jornalista Neon Metin husu se Mario Antonio hatene katak ema sira nia tula ne’e mak hetan kazu positivu COVID-19? Nia foin rona, no nia la hatene se ema nain 3 ne’e sae nia bis ka lae. 

“Pasajeiru hotu mak hau ho hau nia ajudante nain ida tula mai hatun hotu iha Hotel Katuas. Durante ami nia viajen hosi batas mai Dili ami la para iha dalan. Mai lansung hatun sira iha Hotel Katuas,” Mario Antonio aumenta.

Antonio mos esplika katak bainhira hatun tiha pasajeiru sira, nia ho nia ajudante fila deit. La iha ema ida mak husu atu teste sira, ka koko sira. Nia mos nunka hetan kontaktu ruma atu ba hetan teste bainhira nia fila tiha ba uma.

“Hau foin hetan kontaktu atu teste hau ohin (13/04) meudia. Ne’e mos sira dehan mai hau katak aban mak sira teste hau,” Mario Antonio hatete.

Nia esplika ba Neon Metin katak to’o agora nia kondisaun saude diak. Mario Antonio foin mak iha fen, seidauk iha oan. Nia ho nia fen hela hamutuk ho nia bin sira, no nia bin iha oan nain 4.

LEAVE A REPLY

Please enter your comment!
Please enter your name here