Reportazen Zevonia Vieira
Primeiru Ministru, Taur Matan Ruak hasoru malu ho Prezidente da Republika, Dr. Francisco Guterres Lu Olo, hodi hatoo atividade seminal governu nian.
Hafoin enkontru ho Prezidente da Republika, Neon Metin halo klarifikasaun relasiona ho Primeiru Ministru Taur Matan Ruak ne’ebe halo enkontru ho STAE karik koalia asumtu Eleisaun antesipada ne’ebe bele akontese? Ba Neon Metin Taur Matan Ruak hatan halo enkontru ho STAE hodi hare sira nia preparasaun.
“Hau hasoru sira para hatene sira nia preparativus, tanba ita boot sira hatene katak iha loron 10 Fevereiru bainhira Prezidente da Republika koalia ho imi, nia hateten katak eleisaun antesipada hanesan ultimu rekursu, ida ne’e katak la taka dalan. Nudar Primeiru Ministru tenke hatene kondisaun hirak ne’e, sekarik buat ne’e akontese. Se la akontese diak liu, tanba ema hotu baruk ona ba eleisaun”, hateten Taur Matan Ruak iha palacio prezidensia 28/02.
Neon Metin mos koko halo konfirmasaun relasiona ho karta demisaun ne’ebe entrega ona ba Prezidente da Republika, ne’ebe tuir informasaun katak presija pondera [tetu. Red] didiak hosi Primeiru Ministru, “Kkarta hau aprezenta ona, restu ita hein deit”.
