Home Feature Moris Ho Difisiensia Laos Barreira Atu Invole Iha Mundu Arte

Moris Ho Difisiensia Laos Barreira Atu Invole Iha Mundu Arte

1497
0
Noviano Jen Claudio halo atividade pinta iha Arte Moris/ [Foto: Adalgisa Pereira | 22.02.2021]

Reportazen Adalgisa Pereira*

Difisiensia laos barreira ida ema ida atu hakat no partisipa iha prosesu dezenvolvimentu, moris ho difisiensia laos obstaklu ida atu hatudu abilidade.

Noviano Jen Claudio moris ho difisiensia fiziku, iha talentu ne’ebe mak nia espresa liu hosi arte. Noviano oan daruak hosi Joana da Costa  ho Oscar Teles oras ne’e dadaun involve hela iha grupu artista nian iha Arte Moris nudar pintor tuir ninian imajinasaun.

Maske Noviano no nia alin moris ho difisiensia maibe inan-aman iha korajem boot, hodi fo oportunidade ba Noviano hodi atu nia talentu.

Jornalista Neon Metin dadalia ho Noviano ho difisiensia fiziku konaba oportunidade ne’ebe nia hetan iha Arte Moris, oinsa atu aprende mundu arte. Iha Arte Moris, Noviano komesa sente iha mudansa ba nia moris, tanba nia fiar katak mudansa ne’ebe nia, haburas liutan abilidade ne’ebe nia iha no prontu involve-an iha mundu arte.

“Arte Moris ne’e hanesan hau nia uma, tamba ita aprende buat barak laos ba pinta deit maibe iha mos musika, teatru no aktividade barak no mos fo hanoin ba malu, fahe esperensia ba malu.  Pinta ne’e ita haree fasil liu, maibe ita halo ne’e difisil tan ne’e ita tenke hakaas an, lalika aproveita fatin ida ne’e hodi toba deit, ita tenke hakaas an halo netik buat ida”, tenik Noviano iha Arte Moris

Nia hatutan aprende iha Arte Moris la haree ba nivel edukasaun no idade, fiziku ema ho difisiensia maibe haree ema hanesan no livre hodi espresa saida mak ita iha

“Iha ne’e la haree ba fiziku, maibe haree ba saida mak hau bele halo livre, iha Arte Moris ne’e la haree ba nivel eduasaun boot ka ki’ik, la haree ba idade no fiziku ka ema ho difisiensia, livre ba ema hotu atu aprende”, hateten Noviano  ho kontente

Laiha limitasaun ba ema hotu atu espresa nia talentu, laiha limitasaun ba ema hotu atu partisipa iha prosesu dezenvolvimentu, laos sai bareira ba ema ho difisiensia sira atu hatudu sira nia matenek iha mundu. Importante tebes partisipasaun no prespektiva inkluzivu iha Timor-Leste.

*(Adalgisa Pereira estudante UNTL ne’ebe halo estajiadu iha Neon Metin)

Print Friendly, PDF & Email

LEAVE A REPLY

Please enter your comment!
Please enter your name here