Reportazen Santina Lucia da Costa
Moras Ispa domina iha Centro Saude Ossu, municipio Viqueque. Tuir dadus husi tinan 2020 hamutuk 1,984 pasiente ne’ebé mak sofre moras ispa, nia kauza mai husi bailoron, rai rahun maka’as, konsumu hahan la moos, nono bee la tasak, liman foer la fase antes kaer hahan.
Neon Metin halo entrevista ho Xefe Centro Saude Sssu, Dra. Elsa Esperanςa M. da C. Guterres konaba moras ne’ebe domina iha Ossu. Ba Neon Metin Dra. Elsa hateten Centro Saude Ossue rejista moras ne’ebé maka’as maka ispa.
“Moras ispa ne’e nia impaktu dalaruma iha tempu bailoron ita dehan rai rahun, tempu ida agora talvez ita konsumu hahan, bee sira ne’ebé nono la tasak, no dalaruma ita kaer serbisu ruma ita nia liman foer la fase kaer hahan han de’ít, husi buat sira ne’e mak hamosu kauza ida,’’ hateten Dra. Elsa Esperanςa M. da C. Guterres, iha Centro Saude Ossu, Postu-Administrativu Ossu, Munisipiu Viqueque, 22/03.
Dra. Elsa dehan maske rejistu moras ispa domina iha Ossu, maibé nafatin mantein oinsa mak atu minimiza ida ne’e, mak nafatin mantein triajen no SISKA mós lao nafatin, atendimentu ne’ebé mak komunidade presija, lao nafatin fahe informasaun, nune’e komunidade sira bele antende oinsa reduz moras ida ne’e.
Liga ho rekursu humanus, Xefe Centro Saude Ossu tenik katak, rekursu humanu sufisiente, no la taka dalan, agora dadaun iha prosesu rekrutamentu ba internatu sira, sei mai iha tempu badak hodi apoiu serbisu iha vizitasaun familia.
Iha CentrO Saude Ossu, inklui postu saude 10, iha profesionais saude hamutuk 54, husi 54 ne’e kompostu husi mediku, enfermeiru, parteira no aliadu, nune’e mós iha voluntariu oan sira hakarak atu serbisu voluntariamente iha Centro Saude.
kona-ba fasilidade, Dra. Elsa, dehan Centro Saude Ossu dadaun ne’e seidauk iha uma maternidade ba inan sira ne’ebé mak atu tur ahi, fasilidade uma ketak ba los ida ne’e laiha, maibé provizoriamente uza hela uma saude materna infantile ninian.
“Centro Saude Ossu laiha uma maternidade, entaun ami serbisu no enkontru hamutuk administrador postu-admiministrativu Ossu, autoridade suku, xefe suku no xefe aldeia sira, ami enkontru hamutuk hodi desidi planu prioridade ne’e ba iha postru-administrativu Ossu ne’e atu harii uma maternidade.’’ Haktuir Dra. Elsa.
Nia hatutan transporte centro saude nian, iha kareta multi-funsaun ida ho kondisaun di’ak, dadaun ne’e halo hela movimentu, apoiu pesoal saude sira ba halo atividade no iha motor 16.
