Reportazen Zevonia Vieira
Ministeriu Saude (MS) deteta tan kazu konfirmadu foun COVID-19 ba loron 28 Marsu hamutuk 11, liu hosi zoom press conference, Dr Rui Maria de Araújo, Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS relata ba jornalista sir akatak evolusaun surtu COVID-19 iha municipio Dili deteta kazu foun, nune’e kazu detetadu iha municipio Dili hosi loron 7 Marsu – 28 Marsu 2021 hamutuk 329.
Hosi zoom press conference Dr. Rui informa katak ohin kompleta semana tolu, hahú deteta kazu pozitivu iha BTN II, Aldeia Terrasanta, Suku Madohi, no mós kazu iha Aldeia 20 de Setembru, Suku Bebonuk.
To’o ohin, iha cluster 54 iha Munisipiu Dili, maibé ho baze da evolusaun propagasaun virus iha cluster sira ne’e, durante semana rua ikus, sura husi dia 14 de Marsu de 2021, ekipa konjunta saúde deside atu deklara katak iha cluster 11 (20%), maka la ativu ona iha transmisaun virus, tamba iha semana 2 nia laran ona la iha kazu foun, no sira ne’ebé kontaktu-besik ho kazu pozitivu iha cluster hirak ne’e, sira nia rezultadu teste PCR negativu dala rua.
Dadus jeral ba loron 28 Marsu deteta kazu foun hamutuk 11, kazu rekuperadu 13, kazu ativu 322, hosi kazu foun nain 11 ohin iha mane nain 7, feto nain 4, sira hotu la ho asintomatiku.
Husi horiseik loron 27 Marsu to’o loron 28 Marsu hamutuk ema nain 497 mak halo teste PCR, inklui ona iha laran 196 ne’ebé mai husi pedidu autorizasaun esepsionál atu sai husi serka sanitária iha Munisipiu Dili.
