Reportazen David da Costa Gusmao*
Diresaun Nasional Meterologia no Geofisika (DNMG) distribui komunidadu imprensa ba media sira, relasiona ho udan no anin boot ne’ebe akotese iha loron 3-4 Abril.
Liu hosi komunikadu imprensa, loron 05/04, DNMG informa katak simu mensajem ka duvidas balun husi publiku, husu kona ba kondisaun tempo nian, liu-liu atu hatene udan bainhira mak bele para, no DNMG sei publika informasaun liu husi pagina DNMG nian no distribui ba media sira.
Diretor Diresaun Nasinal Meterologia e Geofisika (DDNMG), Tereneio T. Fernades Moniz dehan DNMG sempre fo informasaun no previzaun tempo loron-loron liu husi media sosial (MedSos) pagina ho ID facebook DNMG Timor leste), blog DNMG no RTTL iha Kafe dader no Gazeta 24 horas. Alem ida ne’e mos sempre fahe ba instituisaun relevante sira hanesan Secretariado Estado Protesaun Civil, Media no radio komunidade (Rakom) ne’ebe ezisti iha teritoriu Timor laran no ajensia sira ne’ebe serbisu ba redusaun risku dezastre nian.
“DNMG uza tipu/klasifikasaun avizu meteorolojikus mak hanesan avizu jeral uza bainhira observa no analiza kondisaun tempo iha estado normal ka neutru (ex. udan, anin ho intensidade fraku ba moderadu) no tensaun uza bainhira observa no analiza kondisaun tempo ho intensidade moderadu ba forte”, dehan Diretor DNMG.
Nia esplika liu tan Atensaun Espesial uza bainhira observa no analiza kondisaun tempo ho intensidade forte ba muito forte no alerta ne’e uza bainhira observa no analiza kondisaun tempo extremu (extreme weather/cuaca buruk).
Nia husu ba komunidade tomak iha teritoriu Timor laran hotu, atu mantem kalma no nafatin akompanha informasaun ba kondisaun tempu hosi fontes neebe konfiavel no Kredivel liu-liu instituisaun ka autoridade neebe serbisu iha ramu Redusaun Risku Dezastre.
*(David da Cost Gusmao nudar estudante UNTL ne’ebe halo estajiu iha Neon Metin)
